Causis quae nondum patent apparatus iste volans (notissima "Alouette II") cecidit super hortum ubi homines versabantur, propter viam quae fert a Salin-de-Giraud ad Arelate (Arles), in meridie Gallorum.

Secundum auxiliares publicos, alii quoque homines per casum helicopteri sunt vulnerati; sed ii, qui in aeria navi vehebantur, numero IV, incolumes exierunt. III autem viri defuncti, erant tam clientes cauponae "Chez Bob", quam ea femina quae, amputato crure, in nosocomium Massiliense debuit conferri. Qui vero utebantur helicoptero sunt individui unius familiae, quae ad cauponam prandiandi causa venerant volantes.

Attamen, o urbanam perniciem! quum domum regressuri per caelum essent, incertis adiectis, navis eorum delapsa in terram est; et in eos qui volatus spectandi causa de caupona prodiverant, funestum impactum egit. Sic res narratur a testibus. Nam per auctoritates –caute agitur vestigatio rerum et inquisitio– nihil adhuc est de tam alieno casu renuntiatum.