Vinifures ad portas!

Non erat id "furtum saeculi": nemo mortuus vulneratusve, nec singula glans pistoliis latronum emissa (re vera nescimus, an hi omnino armati essent). Etiam pretium praedae - merces cuncti valoris circiter centum milium dollarium - sane non par sit huius eventi loco: oppido scilicet Atherton Californiae, media in via inter San Jose et San Francisco, ubi multi magi computatrales Convallis Siliceae necnon mercatores locupletes rerum computatralium habitare solent. Res tota ne ad acta diurna certe pervenisset, nisi rerum raptarum genus: vina luxuriosa Gallica et Californiana, quae ad peculiares annos optimae vindemiae spectant.

Fures spreverunt collectionem horologiorum manualium necnon computatrum portabile novissimae generationis. Reliquerunt intacta etiam permulta vina mediorum (i.e. non optimorum) sive annorum sive generum. Non prateriverunt tamen lagoenam magnam (sesquilitrae) bordeaux Château Pétrus anni 1959, quod genus in auctionibus 11 milibus dollarium per lagoenam traditur. Nec manus abstulerunt a pretiosissimo, licet iuveni (2002) cabernet familiae Jones, qui vinicolae in convalle Californiana Napa vineas tenent. Medium pretium lagoenarum e domo hac Athertiana ereptarum tria milia dollarium esse putatur.

Furta vinorum luxuriosorum calamitas nova Californiae necnon aliarum civitatum USAe fiunt - docet diurnarium „International Herald Tribune” detector Joseph Wade, cui hoc furtum novissimum investigandum est. Assentitur ei Daphne Derven, vinorum ciborumque perita: Sicut apud Aztecos socolata, apud nos vinum nummus validissimus fit. Alia calamitas sunt imitationes vinorum ad peculiares annos spectantium, ita ut vino novissimo repleta lagoena pro vino veteri ab emptore putetur. Fures imitatoresque ad agendum allicit ipse mercatus vinorum luxuriosorum, citissime ultimis in annis evolvens: ita cum anno 2005 in auctionibus Americanis necnon Europae Occidentalis vina haec pretio 166 milionibus, tum anno sequenti iam 240 milionibus dollarium venum iverunt (inter quae etiam maxima in historia mundi vini emptio: 50 cistae lagoenarum Mouton Rothschild A.D. 1982 pretio 1,05 mln USD in domo auctionaria Londinensi Sotheby’s venditae).

Rebus ita stantibus, non mirum videatur plures pluresque vinorum collectores cellaria sua variis claustris electronicis his diebus instruere, nec procul absit tempus - secundum saltem Evanem Goldenberg, artis merces protegendi peritum - cum lagoenae ipsae instructae sint cubis electronicis, quorum usu a furibus raptae de satellitibus reperiri possint. Verisimiliter etiam Interpol mox archivum tenere cogetur, ubi vina rapta pretiosissima - sicut nunc picturae artificum veterum - inscribi debeant. Donec tale archivum internationale habeamus, fures fere incolumes auctionibus interesse possunt.

Festinandum est, nam mox habebimus editionem publicam anni 2005, cuius "plebea" quidem vina, ut exempli gratia Château Latour, octingentis per lagoenam dollariis venum praebeantur.

Scripsit Nanompouphos