Septemdecies in televisoria iactatum est

Decimum septimum annuale agon pan-Polonum iacturae malleolis in album televisificum in vico Ionkovia provinciae Masuriae modo habitum est.

In categoria iactus stabilis e longitudine 15 metrorum bis agon haberi debebat, nam primum nemo iactatorum televisorium malleolo accurate petere valebat. Quod tamen iterato iactu contigit domino Mattheo Petro Prus, scriptori librorum Cracoviensi. Is victor hornotinus iactus stabilis pronuntiatus est.

De iactura campestri tamen - qui ludus aliquantum similis est pilamelleo (Anglice golf) - in pratis, silvis necnon lacu Ionkoviensi congelato per tractum 2.5 chiliometrorum habita, victorem discessit agricola vicinae vici Godki, qui ideo pseudonymo tantum "Pestek" notus publice manere vult.

Quinquaginta athletae agonibus adfuerant. Agon pan-Polonum iacturae malleolis in album televisificum primum nono decennio exeunte praeteriti saeculi a diurnario gastronomico Petro Bikont necnon cantatore Iaroslao Gula peractum Ionkoviae erat.

Scripsit Nanompouphos