Vassintonio ex urbe – Intra spatium duarum horarum tempore diei Saturni postmeridiano puer balneans virque velitabulans ante Insulam Hutchinsonianam prope Portum Sanctae Luciae a caniculis marinis morsi esse hodie in actis diurnis „South Florida Sun-Sentinel" referuntur. Pueri novem annos nati morsu caniculae violatas esse clunes alterumque femur. Virum autem tricenarium velitabulantem vulnere affectum esse dextri malleoli, i.e. articuli pedalis. Utrumque hominem violatum curatum esse in nosocomio.

Loca litoralia non erant custodita. Locutor quidam municipalis: "Nolumus" inquit „hominibus terrorem inicere, sed cum verum sit foris in aquâ caniculas versari, oportet cavere". Securius esse balneare prope partes litorales, quae custodirentur. Mense proximo praeterito nuntiati sunt tres impetûs canicularum ante litus Insulae Hutchinsonianae facti.