Sulmone, in vico Aprutino, soliti sunt fideles singulariter Christi resurrectionem celebrare.

Die Paschatis mane ex templo antiquo Sanctae Mariae Sepulcri dicato exit pompa fidelium, quam statuae tres a Laureti Matris Dei Societatis fratribus umeris vectae praecedunt, Christum resurrectum et Ioannem Petrumque apostolos effingentes. Sub aquae ductus antiqui arcu consistit Jesus, apostoli autem transportari pergunt ad templum Sancti Philippi Neri.

Pulsat uterque, sed nemo respondet; cum autem iterum Ioannes ianuam percussit, inde Mater Dei atro pallio induta exit, candidum parvum sudarium ad lacrimas tergendas manu tenens. Apostoli cum Maria in medium forum vehuntur, Mater in altum extollitur ut longius aspicere possit. Cum denique Jesum resurrectum recognovit, insana cum excitatione pallium atrum et sudarium reicit, tunicam viridem rubramque rosam manu destrictam revelans, et quam celerrime ad latus filii sui discurrit; templi sacra aera subito resonant, dum duodecim candidae palumbes e Virginis basi evolant.

Scripsit Herimannus novocomensis