SPIEGEL ONLINE - 10
LONDINIUM
Puerum tredecim annos natum accusatum esse inter sicarios
Astynomi Londinenses in hodiernâ accusatione officiali contenderunt puerum quendam tredecim annos natum die Parascevês pugione percussisse Paulum E. quattuordecim annos natum. In actis diurnis, q.t. "Sun", puer sicarius scribitur scelus commisisse mandatu alius pueri natu maioris, qui sit dux gregis cuiusdam scelesti.
Londinio ex urbe - Paulus E. brevi postquam a sicario oppressus est in nosocomio mortem obiit. Duo alii pueri 14 annos nati, qui dicuntur facinoris sanguinolenti fuisse participes, manserunt in custodiâ perquisitoriâ. Iuvenis autem 19 (undeviginti) annos natus cautione datâ dimissus est.
In „Sun" Paulus refertur sicario acclamavisse: "Quomodo, obsecro, istud mihi affers? Te nôvi ex tanto tempore!" Hoc fratri suo maiori natu narratum esse a Stephano M. quindecim annos nato, qui item vulneratus esset quinque ictibus. Ducem cuiusdam gregis adulescentium, cum Paulum arreptum retineret, illi 13 annos nato imperavisse, ut eundem pugione percuteret. Secundum acta diurna „Sun" circiter 20 adulescentes hoc scelus aspectaverunt.
Ex mense Februario exeunte Londinii septem adulescentes oppressi armis igniariis aut cultris sunt interfecti. Iidem eorundemque percussores fuerunt nigritani. Postquam tres adulescentes sunt interfecti, astynomi medio mense Februario condiderunt commissionem specialem. Tamen series facinorum violentorum nondum est interrupta. Nocte etiam proximâ praeteritâ in parte Londinii orientali iuvenis 19 annos natus telis perfossus graviter vulneratus est.
Hanc relationem d.10. m.Apr. a.2007 in periodico interretiali „Spiegel online" inventam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/
Scripsit Nicolaus Gross
|
