Tampâ ex urbe Floridanâ - Quadringentis (400) annis ante navis, cui impositus erat idem thesaurus enormis, aquis submersa est. Nunc urinatores negotiationis, cui nomen est „Exploratio Marina Odyssêa" (Odyssee Marine Exploration) praedam opîmam ad lucem reportaverunt: dimidium milionem monetarum argentearum et aliquot centum monetas aureas et res arte factas, quibus pretium universum aestimatur esse quingentorum milionum dolariorum. Si rectê aestimatur, hôc thesauro superatur ille a.1985 repertus, qui fuit pretii quadringentorum milionum dolariorum.

Gregorius Stemm, unus ex negotiationis Odyssêae conditoribus, silentio tegit ipsum locum, quo thesaurus est repertus. In hac regione tot naves esse aquis submersas, ut ipsi thesaurorum quaeritatores nondum certo scirent, cuius nationis, magnitudinis, aetatis esset navis a se reperta. Locum repertionis situm esse in aquis internationalibus.

Gregorius a diurnariis ipsorum "New York Times" interrogatus: "Animi nostri" inquit „inflammati sunt monetarum varietate historicâ. Huius thesauri qualitate atque multiplicitate perspectis collectores admiratione stupebunt."

Monetae interim aeroplano iam transportatae sunt in Civitates Unitas. Nicolaus Bryer, cui mandatum erat, ut easdem monetas aestimaret existimaretve, dixit hunc thesaurum saeculi decimi septimi esse incomparabilem: „Nihil" inquit „nôvi comparabile".

E verbis negotiationis Odyssêae iudicialiter declaratis nonnulli rei periti concludunt thesaurum repertum esse circiter 70 chiliometris a litore Angliae australi-occidentalis remotum. US-Americanus iudex enim foederalis die Mercurii concessit negotiationi, quae petiverat, ut sibi exclusivê liceret in hac regione investigare navem saeculi septimi decimi diffractam.

Negotiatio Odyssêa nihil dixit de monetarum terrâ originali et valore et cusione. Actioni thesaurum e fundo maris elevandi nomen impositum esse „Oloris nigri".

Thesaurus omnium, qui usque nunc e nave diffractâ erant elevati, maximus a.1985 repertus est in "Nuestra Senora de Atocha" nave Hispanicâ, quae a.1622 ante Floridam procellâ exortâ aquis submersa erat. Qui repertus erat a Melvino Fisher thesaurorum quaeritatore.

Negotiatio Odyssêa tredecim annis ante condita est. Ei negotium optimê successit eo quod a.2003 in Georgiâ civitate Americanâ repperit quinquaginta milia monetarum in nave, cui nomen fuit "SS Republic of Savannah". E mense Ianuario Negotiatio Odyssêa in Freto Gaditano** quaeritat Anglicam navem bellicam diffractam, cui nomen fuit "HMS Sussex", quae a.1694 aquis submersus est fortasse novem tonnis auri onerata. Si Odyssêa hanc thesaurum reppererit, eundem dividere debebit cum gubernio Britanniae.

_________

*ûrînâtor,-ôris m. - Angl. diver. **Fretum Gaditanum n. - Angl. Strait of Gibraltar.