Berolino ex urbe - Domus, e qua Mors fuerat ventura, aspectum habet omnino non notabilem. En latebras perfectas.

Humilis constat parva domus unius familiae mediam ad viam quercuum in vico Oberschledorn Rhenano-Vestfalico. Ante domum structa sunt ligna ad caminum spectantia, apparet nil notabile. Accolae huius viae assuefacti sunt ad peregrinos. Ex annis haec domuncula conducitur a philotheoris, plerumque Batavis, quorum terra est propinqua.

Itaque nemo miratus est quod ante nonnullos dies tres iuvenes advecti sarcinas suas in domum portaverunt. Nemo vidit eosdem postea in domum apportare dolium caeruleum substantiis chemicis completum. Verisimile est viros hoc receptaculum notabile intulisse in tenebris nocturnis.

Mercurii demum mâne incolae vici Oberschledorn accepêrunt, quae in eorum propinquo facta essent.

Die Martis, h.14.39 subito nonnullae decuriae magistratuum Officii Criminalis Foederalis (BKA) vestimentis civilibus indutorum et manus audax unitatis praestantissimae „GSG9" locis tacitê occupatis tres iuvenes comprehendêrunt. Quare, per nonnullas horas incolis mansit incognitum. Postridie demum, ante meridiem iidem accepêrunt in propinquo islamistas radicales studuisse unam aut complures bombas componere ad attentationem tromocraticam faciendam.

Die Mercurii apud Viam Quercuum nemo apparuit nisi nonnulli astyphylaces vestigia confirmantes. Redierat silentium.

Procul ab oppidulo animi hominum sunt levati: Praeceptores magistratuum securitatis Germanicorum prodibant ad diurnarios, eximiê laudabant investigatores. Jörg Ziercke, praeceptor Officii Criminalis Foederalis (BKA) dixit in Germaniâ impediri potuisse, ne fieret tromocratica attentatio gravissima, nec hodie fieri potuisse nisi aliquot centum investigatores per plus sex menses indefessê laboravissent. Paulo post Volfgangus Schäuble minister rerum internarum (qui est partis Christiano-democraticae) affirmavit „hunc esse diem securitati bonum".

Quidam magistratus Berolinensis alti gradûs nundium huius diei aliquatenus aliter expressit: "Hôc in casu" idem peritus venator tromocratarum inquit, „res feliciter nobis successit. Nunc nobis videndum est, num etiam sint alii greges huiusmodi".

Sex mensibus ante facta est una ex Germaniae post bellum maximis actionibus astynomicis. Ex quo investigatores ab officiis secretis Germanicis et extraneis certiores facti erant de grege Friderici (orig. „Fritz") Germani Ulmensis convertitae 28 annos nati et Danielis S. eius amici Germani 22 annos nati Saravipontani et Ademi Y. Turci Langenensis, quadamtenus electricê excitati erant.

Haec materia solet adhiberi ad res decolorandas, e.g. ad capillos aut dentes lucidiores reddendos, sed etiam in officinis chartopoeticis. Si hydrogenium peroxydatum coniungitur cum acetono et acido, fit mixtura valdê displosiva, quae appellatur TATP.

Hydrogenium peroxydatum habet effectum valdê causticum ad cutem et tunicas mucosas et oculos. Si idem adiungitur materiis combustibilibus, celerrimê potest effici incendium.

Hydrogenio peroxydato fabricari possunt variae materiae displosivae liquidae, quorum effectus comparari potest cum effectu illius TNT (trinitrotoluoli), quae est omnium materiarum displosivarum non-nuclearium efficacissima. Viri illi ab astynomis comprehensi comparaverant duodecim dolia, cui infuêrunt 730 (septingenta triginta) chiliogramma solutionis tricenarum quinarum centesimarum (35%).

Investigatores indicant bombas ex hac solutione constructas futuras fuisse maiore vi displosivâ quam bombas in attentationibus Londinensi et Madritensi adhibitas - ibi enim tromocratas trina aut quina chiliogramma materiae displosivae deposuerant in sacciperiis dorsualibus.

Si tota copia materiae displosivae nunc inventa displosa esset, displosio aequalis fuisset 550 (quingentis quinquaginta) chiliogrammis trinitrotoluoli (TNT) displosis; copia suffecisset ad complures perniciosas attentationes bombarum autocineticarum pluribus locis simul faciendas.

Facile fit, ut construatur bomba materiae TATP. Volfgangus Spyra Cottbusiensis vir armorum chemicorum peritus: „Facultates" inquit „ad hoc faciendum necessariae discuntur iam in institutione chemicâ decimae classis."

Praecepta bombas construendi inveniuntur in interreti; „dzihadistae" (i.e. proclamatores belli „sacri" islamici) talia per gyrum mittunt. Omnes partes huius mixturae maximê displosivae sine ullâ difficultate emi possunt. Homines rei periti a politicis postulant, ut aditum ad tales substantias faciant difficiliorem.

Spyra chemista militaris dicit liquidas materias displosivas adhibitas esse in attentationibus in aeroplanis Britannicis anno praeterito temptatis. At valdê periculosum esse construere et transportare bombas illius TATP: concussione vel minimâ effici posse displosionem. „Si qui attemptator suicidialis cum tali bombâ autocineto impositâ proripitur in multitudinem hominum, vix accidit, ut aliquis hominum vitâ superet."

Omnes tres viri suspiciosi nunc comprehensi islamistae esse iam antea notum erat. Omnes tres antea fuerant in castris exercitatoriis Pacistaniensibus. Cum Fridericus G. ultimo die anni 2006 cum aliis suspiciosis autocineto more notabili observaret Hutieranam basin Americanorum militarem in urbe Hanoviâ sitam, idem in suspicionem vênit attentationis tromocraticae praedisponendae.

Ex illo tempore investigatores secuti erant gregem Friderici G. M.Martio a.2007 actores publici foederales perquisitionem incohavêrunt - primo in membra „Islamicae Unionis Dzihadisticae", quibuscum triumviratus habuit electronicum commercium epistulare.

Semper grex astynomicus observavit omnes motiones trium virorum, telephonemata eorum aucupavit, electronicum commercium epistularum custodivêrunt. Astynomi custodientes semper erant mutandi, ne a triumviratu cognoscerentur. Qui triumviratus agebat more conspiratorum: vix telephonabant, epistulas electronicas sermone secreto celabant.

Difficile erat investigatoribus. At iidem perseveravêrunt - cum maximê suspiciosi inciperent emere chemicas substantias liquidas.

Nunc investigatores scivêrunt suspicionem esse veram. Iuvenes praecepta „Enchiridii tromocratiae" secutos (quod interim facile est inventu in interreti) bombas construere hydrogenio peroxydato.

Similia iam contigerant Londinii et Madriti, ubi attentatores concentraverant substantiam chemicam legitimê emptam. Londinii m.Iunio a.2006 omnis quattuor virorum bombigerorum quaterna vel quina chiliogramma mixturae pernicosae imposuerat sacco suo dorsuali.

At Fridericus G. eiusque grex apparet maiora facturos fuisse: In magnâ tabernâ chemicâ Hannoveranâ emêrunt duodecim dolia caerulea, quae erant pondere 730 (septingentorum triginta) chiliogrammorum et continebant liquorem portionis hydrogenii peroxydati tricenarum quinarum partium centesimarum (35%). Solutione concentratâ materia displosiva facta esset quingentis quadraginta chiliogrammis trinitrotoluoli aequalis.

Investigatores opinantur gregem Fridericianum consilium cepisse mortiferum, quo construerent complures bombas autocineticas; nam idem complura sibi comparavit incensoria et instrumenta additicia ad incensionem telemoderatam faciendam. Per epistulas electronicas locuti sunt de scopis attentationum possibilibus.

Modo aeriportûs, modo discothecas, modo sedes US-Americanas, qualis est basis Ramsteiniensis, cogitabant esse ad attentationem eligendas. De scopo attentationis nondum inter eos nondum convenerat - aut magistratûs non satis bene intellexêrunt sermonem triumviratûs secretum. At naviter operabantur ad bombam perficiendam, in oppido Freudenstadt in Silvâ Nigrâ sito conduxêrunt stabulum autocineti, ubi collocavêrunt dolia caerulea. Iidem iuvenes in dies agebant magis conspirativê.

Investigatores erant consternati de conspiratorum lentis pectoribus. Ipso mense Maiio a.2007, cum in actis diurnis admodum accuratê referretur de grege et de relationibus, quos idem haberet ad Pacistaniam, et de perquisitione astynomorum Germanorum, illi non desiêrunt agere - sed etiam minus notabiliter. Etiam cum habitaculum Friderici ab astynomis perquireretur, iidem non destitêrunt a consilio suo. In epistulis suis electronicis, quas falso putavêrunt astynomis non esse notabiles, irrisoriê inter se dicebant magistratûs nullum argumentum habere, quo in se animadverterent.

Hoc verum quidem fuit, tamen investigatores non fuêrunt inertes: Mense Iulio in oppido Freudenberg clam dolia chemica aliis permutavêrunt, quibus inerat liquor trinarum tantum centesimarum hydrogenii peroxydati.

Haec permutatio doliorum Freudenstadtiensis (sat periculosa) Fridericianos praeteriit. Qui perrexêrunt agere. Mense Augusto conduxêrunt domunculam in Rhenania-Vestfaliâ sitam, Dortmundiae alia instrumenta technica emêrunt ad incensoria instruenda. At astynomi semper eos clam comitati sunt.

Etiam ante nonnullos dies cum ab astyphylacibus sisterentur ad custodiam vehicularem faciendam, primo non sunt sollicitati. In vico Oberschledorn cum habitaculum iniissent, cum unum e doliis caeruleis iam apportavissent in Rhenaniam-Vestfaliam, videntur primo de securitate suâ dubitasse. Unus e grege dixit fortasse se ab astynomis esse inventos. Itaque decrevêrunt, ut officinam suam conspirativam in alium locum movêrent. Nunc etiam investigatores sollicitati sunt. Cum periculum, ne gregem e conspectu amitterent, nimis magnum esse videretur, astynomi decrevêrunt, ut triumviratum comprehenderent.

Singula universa invenienda erunt nunc investigationibus futuris. Adhuc quaeruntur quinque minimum viri, qui huic gregi annexi esse videntur. Diebus futuris emanabit, illi quantum valerent ad attentationem praedispositam.

Quamquam animi hominum sunt levati, investigatores iustê meritoque laudati, gubernatio foederalis sollicitatur de proximo problemate - de illis, qui fortasse invenientur parum celeriter. Quidam officialis ministerii rerum internarum: "Hîc vidimus" inquit „gregem, qui processit valdê conspirativê" At quid accidisset, si eum non statim in initio invenissemus?"

Astynomi tromocratiae periti imprimis sollicitantur de peculiaritatibus huius gregis. Cuius membra omnia fuerunt in indice hominum „in periculum adducentium" („Gefährderdatei") - huius generis hominum sunt in Germaniâ 300 minimum homines.

Etiam aliae peculiaritates huius gregis investigatores tromocratarum sunt nôtae. Omnes tres in Pacistaniâ sunt instituti et „radicalizati" - tales personas investigatores novêrunt sat multas.

Mensibus praeteritis septem islamistae Germani comprehensi sunt in Pacistaniâ. Partim sunt in Germaniam remissi, partim adhuc sedent in custodiâ Islamabadensi.

Praeter hos septem sunt sex minimum alii, qui mensibus praeteritis sint in Pacistaniam profecti. Ab astynomis quam accuratissimê erit quaerendum, quid iidem, si reverterint, in Germaniâ sint facturi.