Genghis Khanis vestigia repetens

Vir Australianus cui nomen est Thomas Cope a Mongolia profectus usque ad Pannoniam triennio pervenit, Genghis Khanis Mongolorum ducis vestigia repetens.

Nullo hodierno vehiculo functus, iter decem milium chiliometrorum cum tribus equis perfecit (summatim tredecim equis, nullus enim totam viam percurrit), quorum unus hominem ceteri commeatus omniaque necessaria transportabant; apud incolas terrarum lustratarum hospitia ad tempus petere solitus erat. Canem album et nigrum "Falconem" (Tigon) appellatum, quo in Kazachistania viator donatus est, inde usque ad metam constantem sodalem habuit. Cum metam contigit, id est vicum Hungaricum Opusztaszer, Thomas dixit se facinoris certos heroas animalia reputare, qui frigora rigidissima atque aestum intolerabilem (a L gradus Celsianos sub nihilum usque ad totidem super nihilum) tulissent. Bis fures equos abstulerunt, canis vero in Ucraina hieme ereptus apud metalla semivivus inventus est: qui ovis crudis et aqua vitae sustentatus post tres septimanas recreatus iter perrexit. Thomas Cope canem secum domum ducturus est, magno tamen cum dolore equos derelinquet.

Narrant historici duces Magyaros in vico Opusztaszer, haud longe a Budapestino, post similia itinera anno LCCCXCVI convenisse ut terram conquisam inter se dividerent, apud tescorum finem quorum alter terminus in Mongolia iacet. "In hoc vico finis est, si et historiae signa et terrarum descriptionem observes" inquit Thomas.

Scripsit Herimannus Novocomensis