Rangunâ et Tochio ex urbibus - Kenji Nagai diurnarius Iapon quinquagenarius die Iovis primus omnium extraneorum in Burmanis manifestationibus interfectus est. Qui mortuus est globulo sclopetario militum percussus, cum esset de manifestationibus contra iuncturam militarem factis relaturus. Primo dictum erat eum interfectum esse globulo aberrante. At hodie rem prorsus aliter factam esse apparet. Statio emissoria iaponica, cui nomen est „Fuji Television", revelavit cinemata, quibus compatriotae Nagaiani horrore corriperentur: Apparet Nagaium a milite humum depulsum, deinde interfectum supplicio capitali.

In imaginibus televisificê emissis apparent milites manifestatores Rangunenses persequentes. Miles casside instructus videtur virum bracis brevibus sandaliisque indutum - qui Nagaius esse confirmatus est - humum depellere. Cum vir auxilii expers prostratus est supinus, manu dextrâ scopocameram complexus, crepitus magnus auditur milite sclopetum in Nagaium directum tenente. Diurnariis stationis Fuji televisificae persuasum est Nagaium non interfectum esse globulo aberrante, sed firmo consilio. Koichi Ito, membrum quondam manûs audacis astynomorum Iaponum, stationi dixit: "Angulo sclopeti applicati videtur hic miles Nagaium telo percutere". Statio Fuji Television nihil dixit de origine cinematis.

Nobutaka Machimura locutor gubernationis Iaponicae princeps ad medicum ambasciatoris Iaponis Burmensis provocans dixit globulum plumbeum pervasisse Nagaii thoracis pectoralis dextram partem inferiorem, cor transfodisse, e dorso exiisse. Gubernatio Tochiensis annuntiavit accuratius perquisitum iri, quomodo Nagaius mortuus esset. Locutor gubernationis Iaponicae hodie dixit exspectari gubernationem Burmanam ex integro investigaturam esse, quare mors Nagaii esset facta. Hac investigatione finitâ Iaponiam decreturam esse, num desitura esset Burmam adiuvare ratione humanitariâ. Nondum certo sciri, num photographus sclopeto necatus esset de industriâ.

Nagaius operatus erat pro agenturâ Tochiensi „APF News", quae solet specialiter referre de regionibus periculosis, in quas pervenire plerarumque stationum televisionis Iaponicarum diurnarii non audent. Toru Yamaji, conditor ipsius APF, rettulit Nagaium id sibi proposuisse, ut „aliquis saltim deberet iter facere in illa loca, quae praeter eum nemo iniret".

Nagaius caelebs missionibus suis parentes iterum iterumque sollicitavit. Michiko eius mater rettulit Nagaium ex annis non visisse domum parentium. Se illum ex Afganistaniâ reversum monuisse, ut tandem desisteret ab itineribus in regiones periculosas factis: „Sed ille nullâ re inhibebatur". Se nunc nihil magis optare, quam ut filium semel etiam revideret.

Collegae Nagaium describunt relatorem, qui opus suum fecerit animo inflammato, et nihil antiquius habuerit quam ut referret de necessitate hominum in regionibus belli et discriminum viventium. Jiro Ishimaru, redactor praecipuus agenturae „Asia Press International", dixit homines a Nagaio interrogatos hunc diurnarium, qui haberetur pro viro moderato, semper magni fecisse: "Qui" Ishimaru inquit „illos interrogabat perquam accuratê atque diligenter, semper sat diu. Credo Nagaium optato obsessum fuisse aliquid faciendi, quod alii non facerent".

E Burmâ hodie lentius nuntii in mundum efferuntur quam antea. Ibidem nullus iam exstat aditus interretialis. Societas publica Telekomiana interretis interrupti causam officialem attulit fracturam capuli subaquatici. At multo verisimilius est gubernatores Burmae militares ipsos coniunctiones interrupisse.

Oppositionis enim participes aditu interretiali orbati vix possunt transferre relationes et photographemata et scopocinemata ad mundum extraneum.

Rangunâ in urbe Burmae omnium maximâ hodie denuo manifestavêrunt aliquot mille cives contra regimen militare. Iterum milites astyphylacêsque violenter animadvertêrunt. Testes oculati referunt mediâ in urbe astyphylaces fustibus mulcavisse decem fere milia manifestatorum.

Duces militares coepêrunt centrum huius urbis portuensis obsaepire. Testes oculati referunt milites et astyphylaces in autoplaustris sedentes vectos esse per vias et lignis filoque ferreo spinoso extruxisse saepimenta tumultuaria.

Rangunâ ex urbe - Telis sclopetorum grandinabatur, bombae fumificae granataque gasi lacrimiferi displodebantur, homines aufugiebant milites mulcantes - milites Burmani quam durissimê conantur impedire, ne fiant novae manifestationes, quibus publicê vituperetur regimen huius terrae Asiae austro-orientalis. Hodie mâne milites astyphylacêsque violenter agentes novem minimum homines interfecêrunt.

Publicis mediis Rangunensibus nuntiatum est inter mortuos esse octo manifestatores unumque Iaponem. Violatos esse undecim manifestatores et plus 30 astyphylaces militêsque.

Relatores officiales contendêrunt manifestatores iaculatos esse lateres et baculos et cultros in custodes securitatis. Hac in „re desperatâ" custodes securitatis non potuisse, quin sclopetîs ederent „ictûs monitorios". At testes oculati rettulêrunt manifestationes fuisse pacificas - sed a militibus violenter esse dissolutas.

Gubernatio Tochiensis confirmavit apud corpus mortuum inventum esse syngraphum Iaponicum. AP Agentura nuntiorum rettulit Iaponem esse scopodiurnarium 50 annos natum, qui operatus esset pro agenturâ AFP. AP ad ambasciatoris Iaponis cooperatorem provocans nuntiat Nagaium in photographemate a praeceptore et a patre esse recognitum.

Burmesiana statio radiophonica Osloâ in urbe Norvegiae exulans, cui nomen est "Democratic Voice of Burma" („Vox Burmae Democratica") rettulit de altero diurnario peregrino, qui in manifestationibus periisset. Hoc autem usque nunc non est confirmatum. Etiam in burmanis publicationibus interretialibus rumores sunt de altero diurnario interfecto.

Res Burmensis quamquam in dies magis in discrimen adducitur, gubernatores militares coram legatis extraneis affirmant se in motum democratarum agere moderatê. Hodie ducum militarium minister rerum externarum vicarius particeps conventûs, qui hodie factus est in sede gubernationis novae urbis principalis Naypyidaw, a quodam legato dicitur dixisse: "Gubernatio decrevit, ut in provocantes ageret modicê".

Minister dicitur dixisse manifestationes effectas esse „elementis destructivis intra et extra civitatem efficientibus". Legatus: "Duces militares" inquit „dixêrunt dicta factaque sua ab aliis evidenter falso intellegi, itaque se legatos ad conventum invitavisse."

Milites et astyphylaces hodie evacuavêrunt unam e magnis viis prope pagodum Suleanum sitis, ubi est unum e centrîs monachorum buddhistarum resistentiae pacificae. Ibidem primum denuo congregati erant circiter decem milia manifestatorum, ut manifestarent contra regimen, quod valet ex 45 annis. Alii observatores computavêrunt manifestasse circiter septuaginta milia hominum. Inter eos fuêrunt non iam monachi nisi pauci. Nonnulli manifestatores postulabant chorîs loquentibus: "Date nobis libertatem".

Manifestatores aufugêrunt, cum milites megaphonîs usi minati sunt factum iri „actiones extremas". Denuo milites in multitudinem sclopetîs grandinavêrunt. Aliquot milia hominum per vias cursitabant, in quibus posita erant sandalia sanguinolenta. Secundum relationes non confirmatas iam heri in viis Rangunae urbis Burmae praestantissimae periêrunt octo maximum homines.

Ne monachi pergerent manifestare, milites iam nocte complura in monasteria invaserant et aliquot centum monachos arrestaverant. Testes oculati rettulêrunt monachos esse mulcatos et e monasteriis abductos. Prope monasterium Ngwe-Kyar-Yan mille fere vicani aggressi sunt autoplaustrum militare lapides iaculantes. Qui fugati sunt gaso lacrimifero.

SPIEGEL ONLINE ex ipso hôc tempore semper utêtur nomine Burmae pro nomine officiali, quod est Myanmar. Nomen civitatis, quae est "Unio Myanmar", a.1989 introductum erat a dictatoribus militaribus. UNO et officium externum solent uti nomine Unionis Myanmar. At US-Americani et adversarii regiminis, qualis est Aung San Suu Kyi mulier praemio Nobeliano honestata, causis politicis nullo nomine utuntur nisi Burmae. Adversus decretum iuncturae militaris haec terra in mediis germanophonis plerumque perrecta est appellari Burma vel Birma.

Monachi, quos Burmani solent religiosê venerari, usque nunc fuêrunt duces manifestationum maximarum omnium, quae factae sunt ex anno 1988, quo violenter repressus est motus democraticus.

Postquam UNOnis consilium securitatis in sessione urgentissimâ, cum Sinenses non assentirent, non potuit unâ voce reprobare caedes Burmenses, gubernatio Pechinensis duces militares in Burmâ regentes sibi familiares monuit, ne rem adducerent in discrimen etiam maius. Jiang Yu, locutrix ministerii externi Pechinensis, dixit curandum esse, ne „res fieret vehementior et intricatior". Alioquin stabilitatem Burmae et regionis prope Burmam sitae periclitari.

USA flagitaverunt, ut Burmana iunctura militaris statim desisteret ab actionibus violentis. Quidam locutor US-Americani officii praesidialis: "Gubernatio Burmana" inquit „utinam ne impediret populum libertatem exoptantem. Quae oportet nunc desistat a vi in manifestatores pacificos adhibitâ."

Germania aliaeque terrae Unionis Europaeae concives Burmam iter facturos praemonent indiciis acrioribus: Officium Externum dissuasit a visitationibus „nisi absolutê necessariis". Hôc tempore computantur circiter 150 Germani versari in Burmâ, inter quos sunt circiter 50 philotheori (i.e. periegetae). Ceteri sunt aut mercatores aut cooperatores negotiationum philotheoricarum.