De Trebae fonte rubescente

Omnibus periegetis, qui sese Romam conferunt, notus est fons Trebae, media in urbe ab architecto Nicolao Salvi aedificatus et anno MDCCLXII Iosepho Panini perfectus. Cuius lymphae Veneris die inopinate ab ignoto rubefactae sunt, qui situlam rubro liquore plenam in amplam piscinam infudit: cum facinus coram omnibus perpetratum esset, multi insuetas imagines videophonis mobilibus captaverunt et mox per interrete diffuserunt.

Folia ab auctore relicta sunt, ubi modi artificum futuristarum repetuntur, qui saeculo vicesimo incipiente antiqua monumenta effringi ad renovatam artem recreandam proclamabant.

Auctoritates tamen postridie nuntiaverunt materiam coloratam nullo modo praeclarum fontem affecisse: iam idem piscinae aspectus rediit quod omnes Romae visitatores meminerunt.

Scripsit Herimannus Novocomensis