AUSTRIA

Cives pericula timent, quae sibi a perfugis immineant

Acerrime his diebus disputatur de aedibus in provincia Pannonia occidentali (Burgenland) exstruendis, in quibus perfugae asylum petentes recipiantur. Ad quas aedes exstruendas magister civium sive praefectus civitatis Eberau, vici mille fere incolarum in meridionali eius provinciae parte siti, civibus insciis ministrae rerum internarum fundos obtulit, scilicet sperans eam rem civitati lucro fore. Sed cives de consilio in secreto capto indignati vehementer ab illo proposito abhorrent timentes, ne quae pericula sibi a tanta perfugarum multitudine immineant. Interim Ioannes Niessl, praefectus provinciae, edixit, ne qui fundi ad eas aedes struendas venirent, dum suffragia populi de ea re haberentur.

Scripsit Volfgangus Austriacus