De operistitio magistratuum Graecorum

Magistratus Graeci mane Mercurii diei operistitium XXIV horarum inchoaverunt. Omnia aedificia publica,in quibus scholae universitatesque, clausa manebant. Quod operistitium cum ad eos quoque pertineat, qui in aeroportibus in officio sunt, omnes volatus usque ad mediam noctem intermissi sunt. In valetudinariis publicis aegroti non curantur nisi subita necessitas accidit.

Athenis media in urbe die Mercurii vigiles publici multitudinem reclamantem gazo lacrimoso dissipabant; quo facto a nonnullis lapides in vigiles coniecti esse dicuntur.

Operistitio consilio pecuniae reservandae reclamatur; quo consilio regimen id quoque providere vult, ut aditus ad munera publica intermittatur , deinde, ut mercedes magistratuum minuantur.

Scripsit Volfgangus Austriacus