De certaminis mundani optimis sedecim

Uruguaia Coream meridionalem superat 2-1

Uruguaia - quae primum poculum Rimetanum anno MCMXXX sibi comparaverat - post annos quadraginta locum obtinuit inter optimos octo certaminis mundani manipulos, Austrocoreanos 2-1 superans. Post octo minuta primum folle in reti proiecto, Americani per totum fere certamen campum adversariis reliquerunt.

Postquam media altera contentionis parte Coreani aequitatem restituerant, Ludovicus Suarez iterum punctum consecutus est. Ludovicus Suárez follem in rete proicit.Celebrant gregis caelestis fautores.

Ghanae duabus horis opus est, ad Civitates Americae Unitas vincendas 2-1

Post tempora certamini aequo superaddita, Ghanenses Africae vexillum in ultimam certaminis mundani partem transvehunt, Civitatum Americae Unitarum manipulum superantes.

Ghanensis aggressor Kevin Prince Boateng primum punctum sibi comparat.

In altera certaminis parte Landon Donovan calce poenario portae custodem Africum Ricardum Kingson superat,qui ceterum mira cum alacritate rete sibi commissum defendit.

Scripsit Herimannus Novocomensis