SECUNDUM EFFECTUS PROBAE DURITATIS...

Tantum septem argentariae Europaeae aegrotant

E nonaginta et una (91) magnis argentariis Europaeis tantum septem examen duritatis a Consilio Europaeo Mensis Bancariis Supervisendis (CEBS) peractum non superaverunt. Quae argentariae debiles sunt quinque Hispanicae (Diada, Espiga, Banca Civica, Unnim et Cajasur), Germanica banca hypothecaria Hypo Real Estate et Graeca magna e parte statalis ATEbank.

Proba duritiae in eo constabat, ut argentariae aestimarentur, quomodo rem agerent in condicionibus altioris (3 centesimis opinato) casus oeconomiae, maiorisque incrementi numeri hominum sine labore manentium, ergo multo minoris solito numeri hominum, qui suum aes alienum ad tempus solvant. Talibus condicionibus (adhuc ficticiis) septem supradictas argentarias mox decocturas ab analystis inventum est, nisi iis 3,5 miliarda euronum pecuniae recentis praeberentur.

Qui effectus probationis videntur meliores esse quam multi putabantur, sed - queruntur nonnulli pecuniae locutores - condiciones ficticias ad hanc probam adhibitos fuisse nimis faciles. "Quid faciant multi ex his Europaeis mensis bancariis, qui examen superaverunt, si exempli gratia decoctura obligationum publicarum Graeciae pronuntiatur?" - rogat Jakub Borowski, analyticus Polonicae InvestBank.

Optimistae tamen commorantur in eo, quod inter debiles argentarias nulla trapeza Lusitana (Portugalis) invenitur, nam Lusitania timebatur esse altera (post Graeciam) victima crisis fiscalis inter terras Unionis Europaeae saevientis.

Scripsit iconoclastes.blog.onet.pl