Bundesbank multat consiliarium quod contra Muslimos scripserit

Unus e Nummariae Centralis Theodiscae (Bundesbank) consiliariis, Thilus Sarrazin, a paribus suis unanime vituperatus est quod in libro suo c.t. “Germania dissolvitur”, adversus Muslimos in Germaniam migrantes atque suis moribus faventes scripserit, adeo ut a Germaniae Praeside Christiano Wulff postularunt ut Thilus Sarrazin a Nummariae Consilio expelleretur.

Sarrazin in libro suo scripserat: “Nolo meorum nepotum ac pronepotum patriam fore plerumque Muslimam, ubi Arabice et Turcice dicatur, ubi mulieres rica Islamica utentur, ubi plerique in preces Coranicas cottidie vocentur”.

Europa Muslimos in dies magis magisque accipit; id, ut videtur, non omnibus placet, nec facile de re agitur.

Scripsit Paulus Kangiser