De Angela Merkel et Muslimis

Angela Merkel, cum opinata esset coeptum multiculturale in Germania omnino esse inutile, controversiam haut leniter commovit. Muslimi in Germaniam magis in dies migrant atque suos dissimiles mores important, adeo ut non pauci horam in eos agendi iam pervenisse putent, et linguam non  solum ipsorum sed etiam Theodiscam moresque occidentales colere cogantur; contra sunt qui credant eos esse in Europa sane accipiendos libertatemque eis praebendam ne cultui civili Europaeo inviti favere
debeant; inde bifrons altercatio oritur.

Christianus Wulff Praeses Germanus aliter quam Merkel sentit, nam mense
Octobre incipiente affirmavit Christianismum Germaniae participem profecto esse itemque Iudaeismum at nunc Germaniae quoque participem Islamismum; at multi concives hac re sollicitantur. Angela Merkel postea quam affirmaverit immigrantibus cultum civilem moresque Germanos esse colendos necnon linguam Theodiscam discendam, mutavit opinionem et in Christiani Wulff sententiam partim se contulit et declaravit Muslimos Germaniae participes esse et meschitas iam inesse in agri oppidorumque conspectu. Auctoris commentarius: Europa videtur negare se radices Christianas habere, nam nihil de hac re in proposita Constitutione Europaea statutum est; itaque deficiunt mores, qui possint prae Muslimis apponi, ita ut immigrantibus culturales portae omnino non pateant; inde politicae dissensiones inutiles eveniunt, nisi historiae memores fiant; multa tamen non politice sed philosophice et historice de his rebus possunt legi vel in Melissa (N.131,2006) a Gaio Licoppe scriptum ³De deo capto² et ibidem a Volfgango Jenniges, ³Ad Gaium de deo capto² (N.134,2006); vel in opera Thili Sarrazin (³Germania dissolvitur²), de qua in Ephemeride iam retulimus; his accedit diarius Chiliensis El Mercurio diei 18 Octobris huius anni.

Scripsit Paulus Kangiser