De ferventibus universitatibus Italicis

A tectis ad stationes hamaxostichorum discipuli Italici reclamaverunt ab regimine dissentientes de proposita lege “Gelmini”. 30 Novembris mensis, Conclave probavit decretum 307 propensis, 252 contrariis, 7 suffragio abstinentibus. Lex proposita statuit denuo constituere Universitatem publicam Italicam, meliores facere sumptus, praemiis afficere discipulos dignos et evitare nominationes propinquorum (haec norma est minoris partis virorum in re publica exercitatorum). Proposita lex“Gelmini” (summae studiorum moderatricis) providet amputationes intolerabiles sumptibus iam exiguis indagationibus destinatis Universitatis Italicae. Itinera difficiliora fiunt ad nominationes iuvenum in Universitatibus. Subsidia dispensata erunt inaequaliter Universitatibus.

14 dicembris mensis de lege “Gelmini” in Senatu disputabitur, sed magistri et discipuli denuntiaverunt quoque interpellationes. A Mediolano ad Panormum, a turre Pisarum ad Regiam Saticulae, 30 novembris mensis discipuli, magistri et doctores indagationis reclamaverunt in tota natione. Mediolani et Patavii iuvenes occupaverunt stationes hamaxostichorum, etiam Genuae et Bononiae discipuli reclamaverunt, Carali et Catinae discipuli custodiverunt viarum frequentiam, Venetiis discipuli occupaverunt rectoris sedem Universitatis “Ca’ Foscari”, Augustae Taurinorum nivibus neglectis iuvenes occupaverunt Regiam. Romae discipuli ob astynomos resistentes non pervenerunt ad forum apud Conclave. Barii discipuli occupaverunt urbem, Neapoli discipuli occupaverunt Castellum Ovi, etiam Saticulae discipuli reclamaverunt apud Regiam contra legem propositam.

Discipuli, magistri et doctores indagationis reclamaverunt contra legem “Gelmini”, eius pericula intellegentes. Sed princeps regiminis, Silvio Berlusconi, fortasse contemnens eruditionem discipulorum et magistrorum, dixit: “Veri discipuli domi student, discipuli tantum societatum turbulentarum vel extra curriculum studiorum reclamaverunt”.

Scripsit Rosanna Scialdone