Vivetne Osama?

Quamvis Praeses Baracus Obama mortuum Osamam nuntiaverit, exstant quaedam de hac re dubitationes vel hae: utrum Osama inermis an in armis necatus sit? utrum victus se captoribus dederit annon?  cur eius cadaver in mare sit statim deiectum? cur vivum non interrogaverint antequam moriretur? an id fecerint? ubinam?  in proxima nave aeroplanigera? in subterraneo praesidio ad securitatem continentalem dicato?

AlCaeda vero ducem mortuum confitetur at id minime refert, nam ubicumque sit Osama vivus aut mortuus, ultionem Septemtrioamericanis totique Occidenti minantur. Si vivus esset penes Septentrioamericanos, id nunquam cognoscemus. Nuntiatur enim  in mare deiectum esse; si id adhuc non esset verum, erit postea profecto.

Una res obstat quin Osama sit vivus:  quod Praeses Obama dixit eum esse mortuum (nisi Praesidem de tota re tum proposita cum acta non fecerint certiorem).

Scripsit Paulus Kangiser