Ahmadinejad: "Motu Islamico res toto in orbe commutabuntur"

Cum plura centena milia hominum Veneris die in mediam urbem Teheraniam convenirent, ut XXXII. rei publicae commutatae annum celebrarent, Mahumetus Ahmadinejad, praeses Iraniae, civitates occidentales monuit, ne rebus Aegyptiis aut Tunisianis se immiscerent. Simul dixit seditionem, quae fieret in Aegypto, a se probari. "Et populos et ipsam iuventutem", inquit, "civitatum Mahumetanarum, praecipue Aegypti, moneo: cavete! Nam vobis est ius libertatis, vobis est ius magistratus creandi. Commutatio rerum Islamica adhuc non finita est; nolite credere eam rem ad unam solam nationem pertinere, qua fieri possit, ut totus terrarum orbis commutetur".

Ahmadinejad motum Islamicum ut ideologiam praedicavit, quae sola superesset. Periisse communismum, periturum capitalismum: utrumque hominibus saluti non fuisse. Sed populum Iranianum rebus motu Islamico commutatis id effecisse, ut toto in orbe homines evigilarent.

Statio televisifica Iraniana nuntiavit multitudinem hoc anno non solum voces solitas emisisse ("Pereant Civitates Unitae!", "Pereat Israelia"), sed etiam Tunisianos Aegyptiosque libertatem desiderantes adiuvisse. Populus, qui in amplissimam "plateam libertatis" convenerat, vexilla Iraniana imaginesque Khomeinii, auctoris rei publicae Islamicae, ostentavit. Similes conventus in plus DCCC urbibus habebuntur.

Partes regimini oppositae aliter atque anno superiore a reclamationibus destiterunt, cum cohortes Islamicae dixissent se eas prohibituras. Praeterea Mehdi Karroubi et Mir-Hossein Moussavi, qui partibus oppositis praesunt, contionari ab iudicibus vetiti sunt.

Scripsit Volfgangus Austriacus