Parva bibliotheca machinata per Lucaniam vagat

Nuntius singularis pluribus diurnis allatus cupiditatem cognoscendi movit. Lucanus magister quidam emeritus, in urbe Ferrandina vitam solitariam agens et discipulorum desiderio flagrans, cum non multi sint qui bibliothecam petant ad libros legendos eligendos, parvam bibliothecam “itinerantem” suis pensibus creare constituit quae per vias et vicos omnis aetatis civibus appropinquet eosque libris donet et ad legendum adhortetur.

Cum de singulari bibliotheca fama iam pervaserit, numerus eorum qui magistrum libris donant magis magisque augescit. Multorum milium iter per sinuosas Lucaniae vias octavo quoque die magister caeruleam machinatam bibliothecam vehens conficit, grato animo libros donat accipitque. Pleraque praemia ei tributa sunt. Epistulae magistro a Gallia et Anglia pervenerunt, ab iis scriptae qui libros se donaturos esse promiserunt. Etiam adulescentibus qui in carcere sunt magister libros donare constituit.

Nonne eiusmodi nuntius praesentibus temporibus animos aliquo modo confirmat?

Scripsit Dominicus Caveosanus