Margarita Hack mortua est

Die paene ultimo mensis Junii mortem obiit Margarita Hack, clara studiosa coeli et siderum. Margarita, Florentiae anno MCMXXII nata a patre protestanti et matre catholica, physicae studuit apud universitatem urbis suae: diploma consecuta est anno MCMXLV siderum, quae "cepheidas" appellant, radios spectroscopio siderali - illo tempore novissimo instrumento - observans. Postea Observatorio Astrorum Tergestino praefuit ibique anno MCMLXXX Institutum Astronomiae condidit. Operam continenter dedit, ut studiosi Italici investigationibus sidereis satellitibus artificiosis utentes interessent.

Libros discipulis universitatum destinatos scripsit necnon libellos lectu faciliores, ut fundamenta astronomiae et astrophysices apud omnes divulgarentur. Saepe in emissionibus televisificis apparuit, ut Tusca cum vehementia propugnaret et pecuniam neglectis institutis scientificis Italicis et opiniones suas atheisticas potentique ecclesiae catholicae oppositas et iura civilia mulierum et homosexualium, quamob rem apud Italiae incolas celeberrima rerum naturae studiosa habetur.

Ut in blogo quodam hodie legitur: "libet illud sibi fingere, Margaritam nunc Deo suadere conantem, eum non esse".

Scripsit Herimannus Novocomensis