In vincula, in vincula coniciatur ... feles!

Numquis ignorat et antiquis et recentibus temporibus animalibus ad scelera admittenda homines usos esse? De duabus felibus diurni nuntios ediderunt.

In regione Russa Komi carceris cuiusdam custodes felem maculosam aspexerunt quae murum ascendere conabatur. Eam cum cepissent, custodes magno cum stupore duos telephonios mobiles invenerunt ventri adligatos. Sine dubio saepe nonnulli, qui in custodia servantur, aliquo modo ea accipiunt quae vetantur; numquam autem acciderat ut feles instrumentum sceleris in carcere adhiberetur.

In urbe Arapiraca (in Brasile posita) custodes animadverterunt felem quandam carcerem inire et exire; hac in re nulla suspicio videbatur esse. Factum est autem ut a custodibus caperetur feles, cui telephonii, “chip” et fugae instrumenta ventri adligata erant. Quare gravis feles cum difficultate movebatur, id quod effecit ut comprehensa sit.

Scripsit Dominicus Caveosanus