Sarah Palin Australiana petitione magistratus desistit

Stephania Banister, mulier quaedam Australiana, post dicta sua infanda ad religionem Mahumetanorum pertinentia petitione magistratus destitit: in percontatione televisifica dixerat se a re Islamica, “quatenus terra” esset, minime abhorrere, tamen secundum leges Islamicas se in Australia vivere nolle. Nec satis erat: nam cum dicere vellet minimam Australianorum partem Corano credere, pro Corano dixit “haram”, quod verbum res nefastas significare constat.

Denique in eo, quod de Iudaeis dixit, summae fuit mirationi: Iudaeos ab „haram“ non teneri, quippe cum suam ipsorum haberent religionem, „quae Iesum Christum sequeretur“. quae dicta  in interrete pervulgata cum passim deriderentur, mulier ipsa ab Australianis cognomine „Sarah Palin Australiana“ appellabatur: Palin (in parte sinistra imaginis, dum in dextro latere Stephania effingitur), quae anno MMVIII pro partibus Republicanorum praesidiatum vicarium petiverat, simili modo risus movit.

Scripsit Volfgangus Austriacus