SPQR sanxit: extra Berlusconius!

Senatores italici pluribus sententiis sanxerunt ut “Eques” Berlusconius, de fraude fiscali accusatus, tribus iudiciis exactis, reus postremo factus et ex lege “Severino” appellata damnatus, munere senatorio ergo indignus, a Senatu amoveretur.

Summis opibus Berlusconius sententiae imminenti obstare conatus est, nihilominus confisus Praesidem Napolitanum sponte sibi delicti gratiam, etsi superbia non petitam, facturum esse. Nuntius omnes nationes pererrare coepit, ubi viri in re publica exercitati, multo minoribus criminibus accusati, sponte munera deponunt, adversus rei publicae dignitatem obsequio. Liceat tantum Helmut Kholum memorare qui, tametsi bene meritus est apud alemanos omnes (ex duabus Alemaniis unam fecit), crimine non gravis praetii accusatus, tamen magistratum dimisit. Contra Berlusconius novam privati civis condicionem iniquo animo fert, propterea quod imperium amittere non tolerat.

“Ferro ignique” idcirco multitudines agitare coepit, se iudicorum communisticorum sententiis damnatum ostendens. Inverecunde suam condicionem Mandelae et Timoshenkae similem esse clamat.Sex annos petere magistratum et aliis muneribus fungi non licebit, id quod ei maximo dedecori est; “Eques” cicutam bibere sibi videtur.

Scripsit Dominicus Caveosanus