Res mirae volant super Caledoniam

Res Inexplicatae Volantes (“RIV”, vel anglice, “UFO”) Caelum Caledonium Illustrant

Iohannes MacDonald, vir 60 annos natus, per rusticam viam Caledoniam nocte gubernabat cum subito, ait, rem mirabilem rotundam nitidamque in caelo apparuisse.

Die 28 mensis Februarii circa horam undecimam prope domum suam MacDonald rem mirabilem, quae complures luminum illustrium series edidit, paulisper volitavisse ait. Minus quam centum metra ab ipso affuisse rem aestimavit.

“Nescio utrum eam fulgore camerae meae terrui; statim evanuit,” inquit MacDonald.

Asseruit RIV fecisse sonum maiorem quam raedam suam.

“Raeda mea clamosissima est, sed haec res sicut mille aspiratrorum pulveris (anglice, vacuum cleaner) sonavit,” inquit. “Cum amicum meum, qui pastor est, compellavi telephonice illum ‘Noli sollicitari quia talia miracula hic saepe eveniunt,’ dixisse.”

Secundum locutorem Auctoritatis Civilis Aeronavigationis rem mirabilem, quam conspexit MacDonald, non fuisse automatum aerium (anglice, drone; postea “automatum”).

“Certe fieri potest ut automatum etiam in tenebris gubernes,” inquit locutor, “sed tibi semper vigilandum est. Etsi automatum lumina habet, non poteris satis bene spectare ut gubernes. Nocte non potes obstacula discernere quia non sunt illuminata.”

Ionathan Hall, automati gubernator, rem inusitatam non esse automatum putat.

“Saepe noctu gubernabam, nec magnitudine nec forma luminum res haec mihi videtur esse automato similis,” inquit Ionathan.

MacDonald asseverat se aliquid non ex hoc mundo vidisse.

“Procul dubio scio quod viderim. Certe est navis sideralis.”

Classis Civitatum Foederatae Americae Aeria (US Air Force) in commentario “Project Blue Book” anno MCMLXIX divulgato dixit circa 5% relatuum de RIVibus non potuisse explicari. Societates autem “National UFO Reporting Center” atque “Mutual UFO Network (MUFON)” putant numerum hunc multo maiorem esse.

Scripsit Stephanus Rex