COOPERATIO PRAECIPUA INTER ITALIAM ET FRANCOGALLIAM

Foedus Quirinale Romae factum est

Intra finem anni Italia et Francogallia foedus Quirinale nominatum icient de cooperatione prope simile pacto facto anno MCMLXIII a Francogallia cum Germania. De hac re Minister Primarius Paulus Gentiloni et Praeses Francogallus Emmanuel Macron Lugduni mense Septembri iam disputaverant. Nuntius vulgatus est postquam coetus Romae paratus, quo septem nationes Europae convenerunt dimissus erat; haec quaesita sunt, dissensiones tollere, consuetudines firmiores iungere ut simul quaestiones de oeconomia, securitate, defensione naturali, migrationibus et cultu civili expedirentur.

Praeter Italiam et Francogalliam Hispania, Graecia, Lusitania, Melita, Cyprum concilio interfuerunt. Immigratio et modus Europam administrandi res graviores fuerunt. Propositum est ut minores dissimilitudines inter res publicas Europae Septentrionalis et Meridionalis redderentur, inter Orientales et Occidentales, ut ait Minister Primarius Paulus Gentiloni, in hoc tempore pecuniae collocationi faventi cum oeconomia rursus tolleretur. Utrum causa communis vincet an non? Si concordia utilis est ad lucrum commune, haec praevalebit; tamen vera contentio, ut solet, ad migrantes pertinet.

Scripsit Lydia Ariminensis