POLONI CONTENDUN UT INIURIAE NAZISTARUM SARCIANTUR

Damna belli a Germania compensanda sunt!

Poloni deliberant, num Germanos in ius vocare sibi videatur, ut iniuriae, quas bello mundano secundo ab iis acceperint, sarciantur. Modo argumenta atque indicia colligi, ex quibus appareret, quanta scelera Germani in Polonos commisissent, Andreas Przylebski legatus in quadam percontatione dixit. Praeterea se eas civitates consulere, quae simili modo id agerent, ut pecuniae pro iniuriis acceptis sibi tribuerentur.

Postulata Polonorum Germani semper renuebant, primum, quod Poloni iam anno MCMLIII de damnis reparandis destitissent, deinde, quod illa ex pactione anno MCMXC facta omnino obsolefacta essent.

Tamen iurisconsulti quidam Poloni pro certo habebant ea iure postulari ac vindicari posse, cum constitutioni rei publicae repugnaret nec valeret, quod anno MCMLIII esset constitutum, quia eo tempore Poloni liberi non fuissent et Unione Sovietica urgente egissent.

Scripsit Volfgangus Austriacus