DE TUMULTU FRANCOGALLICO

Dilatio vectigalium promissa est

Iam a die XVII mensis Novembris seditio populi in tota Francogallia exarsit, cuius fomes incremento vectigalium liquoribus propulsoriis, benzinio et gasioleo, imposito incensa est: signum rebellionis colobium refringens a reclamantibus indutum qui ante nonnullos dies complures partes ipsius Lutetiae ferro ignique, ut ita dicam, vastaverunt. LXXV milia seditiosorum numerantur in Francogallia, V milia in capite, iam imminuti a motus initio feruntur, cum antea prope ter centena milia interfuissent.

Rebellio bonos exitus habuit, cum nuper Minister Primarius Eduardus Philippe declaravisset dilationem vectigalium fore, sed in dies increscente tumultu perspicuum visum est reclamationes non solum adversum incrementa vectigalium sed etiam contra administrationem Praesidis Emmanuel Macron exortas esse. Hoc effecit ut extremistae factionis sinistrae cum extremis partibus dexteris contra “administrationem ditiorum” congruerent. Res tamen multiplex ostenditur: sunt qui putent non solum de benzinio et gasioleo, sed etiam de ratione fiscali, de stipendiis et de re politica agi. Qua re dilatio reclamantibus non sufficit: se nolle “obdormire” post primam deditionem gubernationis; post biduum iterum in foris tumultum renovatum iri.

Scripsit Lydia Ariminensis