SYRI COPIAS PROPE MANBISDSCH COLLOCANT

Turci Curdibus minantur

Exercitus Syriacus loco potitus est prope oppidum Manbidsch, ut prohiberetur, ne copiae Turcorum in eam regionem invaderent. Paulo ante Curdes angustias timentes, si Americani se recepissent, a Syris petiverunt, ut se a Turcis defenderent. Se exercitum Syriacum hortari, ut eas regiones in custodiam suam redigeret et prohiberet, ne a Turcis occuparetur.

Trecenti fere milites Syriaci loca septentrionalia prope oppidum Manbidsch tenere dicuntur. In oppido ipso etiam nunc milites Americani Francogallique collocati sunt.

Curdes, cum anno MMXVI Manbidsch oppugnavissent, bellatores „Civitatis Islamicae“ ex oppido expulerunt. In ea pugna Americani iis auxilio fuerunt. Sed Turci moleste ferebant, quod illa regio a Curdibus occupata est, cum prohibere vellent, ne prope fines suos res publica libera Curdium institueretur, Recep Erdogan, praeses Turcorum, nuperrime edixit copias suas impetum facturos, ut Curdes ex iis locis expellerent.

Scripsit Volfgangus Austriacus