CINEMATA
Leones pro agnis
 Leones pro agnis
(Lions for Lambs)
Civitates Americae Unitae - anno MMVII
Direxit Robertus Redford, scripsit et in scaenam
reduxit Mattheus Michaël Carnahan, imagines curavit Philippus
Rousselot, pelliculam exstruxit Josephus Hutshing, musicam
curavit Marcus Isham, scaenas curavit Johannes Roelfs, vestimenta
curavit Maria Zophres, partes maximi momenti egerunt: Robertus
Redford (magister Malley), Meryl Streep (diurnaria Janine Roth),
Thomas Cruise (senator Jasper Irving), Michaël Peña, Derek
Luke, Andreas Garfield, Petrus Berg; produxerunt Robertus Redford
et Mattheus Michaël Carnahan, distribuit 20th Century Fox.
Quo cogitationes et consilia Georgii Bush
de rebus exteris contendunt? Quid in animis concivium generavit?
Non desunt recentes pelliculae, quibus auctores Americani tam se
quam spectatores de re hac interrogent, dubia insoluta magis quam
responsa per ipsorum mentes disseminantes.
Robertus Redford, praeclarus histrio
necnon cinematum creator, de bello in Afganistania acto in hac
fabula filmica agit.
Tres narrationes alterna vice referuntur:
senator republicanus Jasper Irving acutae diurnariae novum
consilium ad greges tromocraticos delendos et
"democratiam" Americanorum diffundendam diligenter
explicat, mulieris diffidentiam minime superans; magister
universitatis discipulo suo miro ingenio praedito suadere
conatur, ut studiose ad meliorem rem publicam faciendam se dedat;
duo milites quorum alter Mexicanus alter nigricolor in montibus
nivosis Afganistaniae mortem cruentam obeunt, contra tromocratas
forti animo pugnantes.
Cogitationes er sermones de belli causis, de occisorum
catervis, de rerum ingravescentium reis pleramque pelliculam
occupant, breviora atque atrocia colloquia sunt duorum perditorum
militum, quos nulla cum perturbatione dux e longinquo per
satellitum imagines observat: hic est agnus pro quo leones
proeliantur. Sed aliqua spes spectatori et USAe populo
relinquitur: nam magister (ab ipso auctore actus) cum discipulo
acriter et interdum irate colloquens commutationem politicam
fieri posse argumentatur, si sui quisque iuris conscius
democratiam defendat et rei politicae particeps fiat. "Si
pro nulla re restiteris, ob causam quamlibet cadere possis".
Inquieta est pellicula, fere nullis mirificis imaginibus: quam
candidati democratici ad praesidentis sellam viaticum putare
possumus.
Scripsit Herimannus Novocomensis
|
