|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
CINEMATA
Robinus ille Cuculio
Robin Hood, USA/Britannia 2010 Expositor scaenarum: Ridley Scott. Histrio princeps: Russell Crowe. Alii histriones: Cate Blanchette, William Hurt, Mark Strong, Mark Addy. Genus pelliculae: fabula historica. Dixerit fortasse quispiam: “Quid opus est alia pellicula de Robin Hood?” Sic respondere liceat: genus historicum plurimos spectatores etiamnunc delectat ac persona viri strenui pauperes defensuri semper omnibus grata est. Est autem variatio in hac fabula de qua agimus, quod res narrantur quae gestae sunt a viro antequam ille ut latro in Sherwood silva vitam cum praedonibus degerit. Etiam nomen non idem fuerat. Res saeculo XIII agitur in Britannia: quo tempore Robertus Longstride, optimus sagittarius, militia functus sub signis Richardi I qui dictus est “Cor Leonis”, mortuo rege, redire domum constituit. In itinere nobili viro nomine Loxley succurrit gravissime vulnerato, cui exercitus duces mandaverant ut insigne regium matri regis mortui referretur. Robertus nobili viro iam morituro promisit se relaturum esse eius gladium valde carum patri Walter, domino Nottingham comitatus. Casu evenit ut Robertus in capulo gladii inveniret arcana verba inscripta”: “…agni leones fient”. Haec inscriptio quiddam in memoriam viri revocare visa est. Cognito nuntio de morte Richardi, reddito insigni regio matri, Ioannes, cognominatus “Sine terra”, rex factus est. Robertus, cum in terram domini Walter pervenisset, a Walter ei persuasum est ut ibi maneret velut si eius filius esset ne Marion, pulchra mulier mortui, iure hereditatis de Nottingham terris orbaretur. Marion primum infenso animo fuit ficto coniugi, deinde eius amore incensa est cum Robertum pugnantem contra vectigalium exactores admirata esset. Robertus cum cognovisset suum patrem scripsisse Cartham Libertatum ad defendenda iura comitum a regis vi iniuriaque, patefacta coniuratione Francorum contra regem Ioannem, cum comitibus (id est dominis Britanniae) duxit bellum, comitante Marion quoque, ut defenderet a Gallia Britanniam, quo sua peritia eminuit in telis coniciendis: tanta laude in bellando affectus est ut rex ei invidere coeperit ac recusaverit quominus iura libertatis comitibus concederet. Robertus igitur cum hostis publicus iudicatus esset se contulit cum Marion in Sherwood silvam ut, nomine Robin Hood, ab iniuriis regis et potentiorum pauperiores defenderet. Robin virtute, fide, peritia in bello, viro Homeri similior esse videtur sed etiam vir esse Mediae Aetatis, tempore quo nobiles Britanniae pro populo et pro domo sua contra regis superbiam et avaritiam pugnare soliti essent. Histrio magnae laudis Russell Crowe optime partes egit fabulosi sagittarii, cum diu se exercuisset in arcu intendendo et in telis emittendis; expositor scaenarum Ridley Scott intactam naturam silvarum, miserrima tuguria plebis, castella severiora dominorum ostendit; magna praeterea peritia usus machinula imaginibus captandis quoquo versus, fecit ut scaenas valde tumultuosas ac incitatas redderet.
Scripsit Lydia Ariminensis |
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
