CINEMATA
Les Femmes du 6ème ètage)
 Feminae sexti tabulati
(Les Femmes du 6ème ètage - Gallia MMXI)
Pellicula filmica Philippi Le Guay; partes maximi
momenti egerunt: Fabricius Luchini (Johannes Ludovicus Joubert),
Alexandra Kiberlain (Susanna), Natalia Verbeke (Maria), Carmina
Maura (Conceptio); in scaenam reduxerunt Philippus Le Guay et
Hieronymus Tonnerre, musicam elegit Geprgius Arriagada.
Johannes Ludovicus Joubert, mercator nummarius, vitam cum
Susanna uxore frigida et otiosa degit ut severus pater familias
in magna domo Parisiensi; duo liberi in lycaeo longinquo student.
Postquam famula vetula litis causa dimissa est, familia puellam
Hispanicam mercede conducit a matertera nuper arcessita. Nam in
sexto tabulato magnarum aedium vivit parvulus grex servarum
Hispanicarum, quae ex patria dictatura oppressa Lutetiam
confugerunt. Quarum humanitatem et socialitatem Johannes admiratus
alteram vitam incipit.
Iucundissimus spectatoribus est dissimilitudo aridi habitus
Parisiensium, qui gazam tantum et divitias consectantur, a fervore
Hibericarum mulierum, quarum alia cultu catholico, alia fide
communistica, alia domus exstruendae cupidine valde commovetur
ideoque ardenter suam quaeque vitam degit. Interdum risus
movetur, laetus finis animum delectat. Hodie haec fabula de
alienigenis accipiendis spectatorem meditari cogit.
"Pellicula - ait Philippus Le Guay - ex somnio hoc orta
est, alium coetum cum alio communicare posse: vel locupletem in
sextum tabulatum migrare posse, ut cum servabus vivat..."
Scripsit Herimannus Novocomensis
|
