SOCIUS (ALLIED)

Dispositor scaenarum: Robertus Zemeckis. Histriones principes: Brad Pitt, Marion Cotillard.

Tragica fabula de exploratoribus occultis (Allied) a dispositore scaenarum Roberto Zemeckis praebetur , cuius histriones pares Brad Pitt et Marion Cotillard primas partes agunt.

Bello Secundo Mundano emissarius Canadiensis Maximus Vatan egressus in urbem Casaplancam speculatricem Mariannam Beausejour convenit ; simulantes se in matrimonium iunctos esse insidias vitae legati Germanici comparant; interea mutuo amore capiuntur, quamvis sibi non liceat, muneris gravitate, sensibus et animi motibus indulgere. Cum legatus magnifico apparatu exceptus sit, invitati ad receptionem Maximus et Marianna simul caedem committunt. Cum incolumes in Britanniam confugerint, matrimonium ineunt; deinde, sub pyrobolis coniectis, Marianna filiam Annam parit. Coniuges vitam satis quietam agunt cum repente horrenda suspicio vehementer virum commovet: ei nuntiatum est mulierem speculatricem Germanam esse, falso nomine sumpto. Confirmata re, Marianna legatum Casaplancae confitetur occisum esse cum dissidens regiminis Hitleriani esset; post matrimonium, minantibus Nazistis filiolae incolumitatem, se coactam esse ut Germaniae socia iterum fieret et nuntios belli secretos iis communicaret. Tragice res volvitur : debetne ipse de uxore proditionis rea capitis supplicium sumere an cum ea filiaque fugam petere suam et mulieris vitam in periculum adducens? Dum ignitioni aëronavis operam dat, milites adveniunt…Marianna in se arma displodit ut virum servet. Ita evenit.

Occulta exploratio, amor, res politica et historia studium apud spectatores gignunt; optime suas partes histriones agunt, et eorum pulchritudo non nocet. Tamen pellicula velut suspensa apparet inter vetus (revocans ceberrimum opus “Casablanca”) et novum, sine definita proprietate.

Scripsit Lydia Ariminensis

DANS (Dante)

PATRIAE DESIDERIUM (Nostalgia)

ALBUS, ALBUS DIES (A white, white day)

ULTIMUM DUELLUM

PRAEMIVM ROMANVM

Subnotationes fient
ante finem Septembris.