|
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
CULTUS
HEROINE PHOTOGRAPHEMATIS ACTORUM "LIFE" DIEM SUPREMUM OBIIT Mulier vehementer basiata Paucos abhinc dies rebus terrenis erepta est Editha Shain, mulier Americana, quae anno 1918 nata erat. Iuvenis cum esset, quodam in puerorum valetudinario urbis Novi Eboraci munus explebat nosocomae. Die 14 Aug. 1945 omnia apparata radiophonica nuntiarunt bellum, quod Americanos inter et Iapones a mense Decembri a. 1941 gerebatur, tandem confectum esse. Sicut ante aliquot menses acciderat multis in Europaeis urbibus, quorum cives in vias et plateas descenderant bellum illud atrox finitum celebraturi, ita plerique Americani eodem hilari animo nuntium supra memoratum audiverunt eorumque non pauci, viri mulieresque, per vias effusi inter sese laetabundi salutaverunt. Editha quoque e valetudinario exiit ut celebrationis illius quodammodo particeps esset. Ex improviso huic feminae (quam aliqui dicunt iam pansis brachiis deambulantem veluti amplexui paratam) advenit quidam nauta, qui ipsam deosculatus est adeo, ut Editha paene immota ac stupefacta manserit, sicut apparet ex photographemate hoc:
quod non casu paucis post diebus editum est prima in pagina ephemeridis Americanae cui index 'Life', id est Vita. Quid enim novam spem e nuntio illo nascentem melius quam hoc photographema fovere poterat? Quod non immerito a rerum photographicarum peritis inter optima adnumeratur. Sed nec illius nautae facies nec vultus feminae illius tam vehementer basiatae umquam dignosci potuit, saltem usque ad annos praeteriti saeculi septuagesimos octogesimosve, cum ab eiusdem ephemeridis moderatoribus quaesitum est qui fuerint nauta et femina, quorum amplexum basiationesque paene immortales reddiderat Alfredus Eisenstaedt, illius photographematis auctor sive potius artifex. Duodecim tredecimve viri, inter sese interdum rixantes, partem sibi adtribuerunt ab illo tunc ignoto nauta actam; e tribus quattuorve feminis unaquaeque se die illo tam avide basiatam fuisse dixit. Ne multa: accuratis investigationibus factis, iudices quidam adseruerunt nautam fuisse Glenn(um) McDuffie. Qui die 14 Aug. 1945 nondum vigesimum attigerat annum et, cum eius frater etiamtunc stipendia mereret, gaudio laetus propter nuntium de bello confecto auditum, facere non potuit quin illam feminam, quae Editha Shain erat, amplexaretur atque oscularetur. Statua quaedam, fortasse non tam pluchra sicut imago photographica, rem supra memoratam quodammodo perpetuat. Atque Editham eiusque historiam vel historiolam non immerito commemorarunt etiam acta diurna haec: http://tinyurl.com/37lq5k2 Scripsit Victorius Ciarrocchi |
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
