|
|
|
CULTUS
Celeberrimum opus Leonardianum non transferetur in Italiam
 Celeberrimum opus
Leonardianum non transferetur in Italiam
Clarissima toto orbe tabula est super quam
Leonardus Vincianus effigiem pinxit nobilissimae feminae
Florentinae, Lisae Gherardini , quae cognominata est “Iucunda”
a viri nomine Iucundo; quod opus, Lutetiae expositum apud Musaeum
Louvrianum, ex sententia Francogallorum, non licet in Italiam
transduci ut Florentiae apud Musaeum Officiorum post biennium
ostendatur. Cur non? Auctoritates Francogalliae timent ne iter
laedat imaginem fragilissimam super tabulam ligneam pictam, qua
de causa Italicis in commodatum eam non concedendam esse quamvis
plurimi etiam in interreti idem repetierint. Sed frustra. Num
periculum est ne qui nationis fanaticus “Monnam Lisam”
vindicet Florentiae prout opus Leonardianum? Quod ante centum
fere annos iam factum esse constat. Quidam operarius Italus, cum
putavisset tabulam ab imperatore Napoleone Bonaparte in
Francogalliam inique translatam esse, eam facillime furatus est,
nullo custode sentiente. Ipse Leonardus vero venum regi Francisco
I anno MDXVI opus dedit. “Iucunda” reperta est post
biennium in ipsa urbe Florentia: Florentini quod exitum vellent
post saeculum memorare, sed Francogalli de “Monna Lisa”
admodum solliciti sunt.
Scripsit Lydia Ariminensis
|
|
|
