|
|
|
HOMINES IN CONSPECTU
Henricus Belafonte
 Henricus Belafonte
Angelopoli die IX mensis Novembris Praemio Humanitatis Joanni
Herholt dicato (Jean Hersholt Humanitarian Award), a
gubernatore donato, exornatus est inter alios Henricus Belafonte.
Henricus Belafonte, histrio et musicus hodie LXXXVII annos
natu, nigricolorum libertati in USA favit iuniori Martino Luthero
King opes ingentes suppeditando, qui bello miti praefuit post
patrem suum interfectum; functus est etiam munere Ordinis
Nationum Unitarum legati et operam diligenter dedit ad acquisiti
immunitatis defectus syndromen (AIDS) apud Africos et prostatae
tumorem, quo ipse laboravit, repugnanda. Stephanus McQueen, qui
taeniam "Duodecim annos servus" (12 Years a Slave)
creavit et celebrationi aderat, Henricum Belefonte dixit
fructibus famae et gloriae sibi comparatis ad maiora usum esse.
Henricus Belafonte, Novi Eboraci anno MCMXXVII ex migrantibus
Caraibicis natus, post infelicem miseramque infantiam canere et
in pelliculis egit. Postquam in Oceano Pacifico bello altero
mundano stipendia meruit, theatro se dedidit, donec cum musicis
jazisticis concinere coepit. Ab anno MCML canere voluit cantica
populorum ex toto orbe excerpta ac similia componere et in
pelliculis filmicis modis musicis ornatis ut cantor et histrio
agere.  Ex pelliculis "Carmina Jones"
(Carmen Jones), Georgii Bizet praeclaram operam musicam
imitans, eum ad gloriam extulit. Anno MCMLVI publicavit
"Calypso", discum vinylicum modis musicis Caraibicis
ubi celeberrimus "Dies! Canticum musarum lintris " (Day-O
The Banana Boat Song) auditur, de qua ipse interrogatus
"Cantus ille - inquit - est modus vivendi: narrat enim de
patre meo, matre, propinquis, de viris feminisque in agris
musarum et sacchari Iamaicanis ardue laborantibus."
https://www.youtube.com/watch?v=6Tou8-Cz8is
Se etiam dicavit pelliculis filmicis sub magni momenti
scenarum dispositoribus, e. g. Roberto Altman et Sidne Poitier.
Postquam diu iura nigricolorum Americanorum suffulsit, primus
anno MCMLXXXV voluit plurimos cantores convocare ut magnam
pecuniam colligeretur ad Aethiopibus esurientibus subveniendum:
unde concentus cuius titulus fuit "Nos sumus mundus" (We
are the world) factus est.
Vehementer locutus est contra bellum Iraquicum a praeside
Georgio Bush iuniore inceptum, quem appellavit "totius orbis
maximum tromocraten".
Scripsit Herimannus Novocomensis - 11/11/2014 01h40
.
.
|
|
BREVES
SCIENTIAE
SOCIALIA
RELIGIO
SOCIALIA
RELIGIO
|
