|
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
HOMINES IN CONSPECTU
CARAVAGIO ANTE 400 ANNOS MORTUUS Pictor celeberrimus
Die 18 Iul. 1610 in Tusciae oppido c. n. 'Portus Herculis' mortuus est Michaelangelus Merisi, cognominatus 'Caravaggio', a nomine cuiusdam vici prope Bergomum siti. Quo ex vico parentes huius viri, qui anno 1571 Mediolani natus erat, originem duxerant. Iam adulescentulus Michaelangelus in arte pingendi operam ponere coepit brevique inter multos illius aetatis pictores adeo eminuit, ut consilium ceperit Romam adeundi, quia tunc in Urbe artificibus multae occasiones praebebantur suorum operum magno emolumento perficiendorum. Nam haec spes Michaelangelum non fefellit, cui exeunte saeculo XVI et ineunte XVII ansa data est ut suum pingendi studium artemque miram monstraret. "Celeberrimus pictor" a nonnullis peritis appellabatur atque is cum quibusdam proceribus familiaritate quadam iungi valuit. Sed indole praeditus erat Michaelangelus ad offensas accipiendas tam procliviore atque iurgiosa, ut quodam die, simultate quodam cum adulescente futtilibus de causis exorta, eum gladio confodit. Quare hic pictor, Urbe relictâ, quia aliter pro homicidio iniuste patrato capitis poenam luisset, alios in locos confugit: primum Neapolim, deinde insulam Melitam, ubi quodam cum equite magni nominis rixatus est; indeque Siciliam. Postremo, cum illam poenam sibi a pontifice Paulo V remissum iri audivisset, Romam iterum petere contendit atque secum tres tabulas pictas portavit, ut ipsae Scipioni Caffarelli Borghese, pontificis nepoti et cardinali multae auctoritatis, donaret ad gratiam facilius adipiscendam. Sed phaselus, quem Michaelangelus conduxerat, a quibusdam navigationis custodibus interceptus est, ipse duos dies in carcere coniectus, et postquam liberatus phaselum, quo etiam eae tabulae continebantur, frustra reciperare conatus est. Die igitur supra memorato, solis radiis ferventibus dum pictor iam valetudine improspera adfectus in litore currit, humi cecidit et paucas post horas vitâ functus est. Varias huius mortis causas biographi, qui dicuntur, protulerunt: venenum, syphilidem (qui morbus, cum et libidinosus esset 'Caravaggio', excludi haud potest), febris palustris, quam plerique causam veram mortis putant. Utique, ut alia pauca de Michaelangelo adiciantur, omnes fere viri docti adserunt eum summum pictorem fuisse ac praesertim umbrarum luminumque rationes et regulas perfecte nosse, sicut eius septuaginta octogintave tabulae, quae usque ad aetatem nostram pervenerint, satis superque demonstrent. Lenociniis amotis, quae in haud paucis aliorum illius temporis pictorum tabulis non sine taedio aspiciuntur, is totam pingendi artem funditus innovavit, et quamquam in ipsa fortasse aliquid inest, quod eam rationem 'barocam' vocitatam redoleat, ipse tamen semper suus est atque vividiorem in modum suas tabulas semper pingit. Hoc ipso die 18 Iul. 2010 acta diurna Vaticana 'Observator Romanus' inscripta nuntiarunt novam tabulam nuperrime inventam esse, quae Michaelangelo Merisi, cuius vita et ars pingendi stricte coniunctae videntur esse, verisimiliter sit adtribuenda: http://tinyurl.com/36nve3z Scripsit Victorius Ciarrocchi - 19/07/2010 09h33
. .
|
BREVES
SCIENTIAE
SOCIALIA
RELIGIO
SOCIALIA
RELIGIO
|
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
