|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
LIBRI
Primum non nocere
Abhinc decem annos Rebekah Beddoe, mulier Australiana nata septem et uiginti annos, infantulam admodum clamosam peperit. post duos tresue menses, cum infantula sua clamitare desinere noluisset, fessa ac tristior facta est. re in dies ingrauescente, medicum adiit ut remedium quoddam inueniret. qui, etiamsi Rebekah usque ad illum diem mente fuerat sana, pronuntiauit eam morbo quodam laborare, quem Tristitiam post partum aduenientem (Anglice Post-Natal Depression) appellauit. deinde, nullo experimento medico adhibito, dixit homo ille doctus ‘inaequalitatem chemicam’ (Ang. chemical imbalance) cerebro eius nocere deditque ei medicamenta quae omnem istam ‘inaequalitatem’ corrigerent. denique, eam ad psychiatrum misit. unam post hebdomadem, ubi Rebekah cum aliis matribus in ualetudinario quiete colloquebatur, corpus suum improuise ac uiolentissime per decem minuta conuulsum est. psychiater, cum de re certior factus esset, censuit eam et deliriorem fieri plurisque medicamentis egere. Rebekah tamen, quanto plura medicamenta sumebat, tanto in dies aegrotior amentiorque fiebat. duobus annis insequentibus, Rebekah – iam re uera delira - complura facta uesana commisit: filiolam suam neglexit, pudorem omnem omisit, maritum saepenumero percussit, corpus suum identidem laesit, se etiam interficere pluries conata est. postremo, cum omnem spem sanitatis paene omisisset, transmissionem teleuisificam de homibus, qui medicamentis psychiatricis grauiter laesi sunt, casu spectauit. iam primum uenit in mentem hoc nouum cogitatum: quod potebant ipsa medicamenta esse miseriarum suarum fons et origo. hoc suspicata, occulte conata est pauciora medicamenta gradatim sumere. protinus melius se habebat. deinde, adhuc ignaris medicis, per sex menses medicamenta sumere sensim desiit. denique, omnibus medicamentis summa cum difficultate omissis, est – mirabile dictu – omnino sanata. ex illo tempore usque ad hodiernum diem manet Rebekah et sana et laeta et compos mentis. cum marito et duabus filiabus in urbe Melburna habitat uitaque beata fruitur. in casu Rebekah est hoc uere stupore dignissimum: quod ne uni quidem medico uenit in mentem medicamenta ipsa psychiatrica causam esse eius miseriarum. librum, quem Rebekah de aerumnis suis scripsit cuique titulus est Pro remedio mori (Ang. Dying for a Cure), omnibus, qui Anglice legunt, commendo. De Rebekah Beddoe: Quomodo medicamenta contra tristitiam confecta hominibus saepenumero noceant: http://www.telegraph.co.uk/health/wellbeing/4736645/Anti-depressants-just-how-safe-are-they.html De efficientia medicamentorum contra tristitiam confectorum: http://www.newsweek.com/2010/01/28/the-depressing-news-about-antidepressants.html Cur psychiatri morbos mentales definire non ualeant http://www.wired.com/magazine/2010/12/ff_dsmv/all/1 Scripsit Henricus Melburnensis Bagthorpe |
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
