|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
NUNTII 
QUOMODO BELLUM CIVILE SYRIACUM COMPONENDUM SIT
Coram septuagesimo Concilio Communi Ordinis Nationum Unitarum Novi Eboraci Praeses Baracus Obama se cuiusque nationis socium fore, non exceptis Russia et Irania, ut bellum Syrorum solveretur nuper declaravit. Praesidem Bashar al Assad immane facinus contra Syros suscepisse. Pacem fieri non posse nisi ad novum partium principem transiretur. Se maximum exercitum totius orbis ducere nec dubitaturum esse umquam cives vel socios ad unam tantum partem spectantem defendere. Esse eos quibus videretur se tyrannum tueri ad peiora vitanda, sed huiusmodi calamitatem non fieri posse ubicumque certa civitatas popularis vigeret. Contrariam sententiam Praeses Vladimirus Putin contendit: in magno errore versari eum qui non regimen Syrorum adiuvaret: ut adversus Chalifi regnum (ISIS) pugnaretur, societate omnium nationum, tamquam adversus regimen Hitlerianum opus esse. Tamen incursus aëronavium Francogallorum administra Russica exteris negotiis praeposita non probavit. Secretarius communis Nationum Unitarum Ban Ki-moon vehementer Consilium Securitatis reprehendit cum proximo quadriennio nihil prope effecisset ad bellum Syriacum solvendum; nunc , ut ait, res non coërceri potest, nisi foedus maximae civitates fiant. Ex sententia Ministri Primarii Regni Uniti David Cameron Praeses Assad in iudicium vocandus est, cum eum pacis consilii participem non licet esse. Germania pyrobolis milites Chalifi quatere non vult, magnam autem indulgentiam erga Francogalliam proferens. Confecto Concilio Communi Nationum Unitarum, uterque Praeses, procul ab omnibus, sesquihoram de re Syriaca collocutus est; Vladimirus Putin colloquium utile et apertum existimavit: incursum communem aërium contra Chalifi homines constitutum esse, iussu Ordinis Nationum Unitarum, sed de Praeside Bashar al Assad ipsos multum discrepare. Scripsit Lydia Ariminensis - 30/09/2015 14h34
. .
|
BREVES
SCIENTIAE
SOCIALIA
RELIGIO
SOCIALIA
RELIGIO
|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
