|
|
|
NUNTII 
Crepidae contra Georgium
 De calceis in Georgium Bush coniectis
Quid plerique Iraquiae cives libenter Georgio Bush facere
cupiunt? Huic quaestioni respondit diurnarius quidam retis
televisifici Aegyptii "Al Baghdadiya": canem Georgium
appellavit et ambos calceos in praesidentem inopinate Iraquiam
visitantem et percontationem communem habentem iecit, propositum
suum non assequens quia caput reclinans praesidens missilia
insueta vitavit. "Hoc est, o canis, osculum salutationis -
clamaverat - a viduis et orbatis et omnibus illis qui in Iraquia
occisi sunt!"
Virum confestim custodes invigilantes comprehenderunt et in
vincula coniecerunt. Rete televisificum libertatem diurnario
restitui poposcerunt, quod facultate tantum opinionem suam
patefaciendi usus esset; sed regimen facinus hoc
"turpe" dicit, quod famam diurnariorum Iraquicorum
offendant. Bagdati multitudo incolarum in insula Shiitarum
libertatem Muntadar Al Zaidi, diurnarii hodie omnium celeberrimi
iam bis ab Americanis comprehensi, postulaverunt. Unus ex
reclamantibus "Non uno aut duobus - inquit - sed centum
calceis percuti meretur: quisnam eum huc cupit venire?"
Scripsit
Herimannus Novocomensis - 16/12/2008 00h26
.
.
|
|
BREVES
SCIENTIAE
SOCIALIA
RELIGIO
SOCIALIA
RELIGIO
|
