|
|
|
NUNTII 
Nationes Unitae et Americani consilia Israeliana reprehendunt
 Nationes Unitae et Americani consilia Israeliana
reprehendunt
Ban Ki-moon, qui Nationibus Unitis praeest, Martis die
propositum regiminis Israeliani damnavit, quo iterum MDC
habitationes novae in regionibus occupatis exstruerentur. Ban
denuo declaravit eas colonias a iure gentium abhorrere. Ceterum
ea consilia pactioni „Roadmap“ appellatae repugnare,
quam Nationes Unitae cum Civitatibus Unitis Americae, Russia, et
Unione Europaea fecissent; quibus consiliis omnia, quae ad pacem
faciendam pertinerent, labefactari.
Habitationes supra dictae in vico Hierosolymitano „Ramat
Shlomo“ exstrui dicuntur; qui vicus in regione occupata
situs est, quam Palaestinenses ut partem rei publicae suae
futurae sibi vindicant.
Ea consilia eo tempore cognita sunt, quo Ioannes Biden,
praeses vicarius Americanus, colloquiis de pace facienda
renovandis operam dedit. Biden, cum Martis die primum ministrum
Israelianum Netanyahu convenisset, dixit propositis Israelianis
ad coloniam Ramat Shlomo pertinentibus fidem subrui, qua nunc
opus esset; deinde ea consilia sermonibus utilissimis repugnare,
quas cum Israelibus habuisset.
Scripsit
Volfgangus Austriacus - 11/03/2010 21h27
.
.
|
|
BREVES
SCIENTIAE
SOCIALIA
RELIGIO
SOCIALIA
RELIGIO
|
