|
|
|
NUNTII 
De navibus Persicis
 De navibus Persicis
Magno clamore elato, instrumenta Iraniae
communicationis nuntiaverunt duas naves bellicas Persicas,
alteram liquidis vehendis, alteram venatoriam, satis vetustam,
hesterno die in mare Mediterraneum ingressas esse ut ad portum
Syriacum Tartus appellerentur. Navarchus classis Persicae
gloriose declaravit naves imperium maritimum rei publicae
Islamicae ostendere. Sunt qui existiment nihil novum nec dignum
cura accidisse, iterum in anno, sed rerum complexio attente
observanda est: societas mutuae utilitatis pacta est ab
auctoritatibus Iranicis et Syriacis ad exercitationes navales
fovendas. Administer Britannicus praepositus Exteris Negotiis
affirmavit, ut scripsit etiam diurnarius Patrick Seale, parvum
bellum sine proeliis fieri; interea auctoritates Americae
Civitatum Foederatarum nuntiaverunt magnum numerum aëronavium
sine pilotis pervolare in caela Syriaca ut ex alto despicerent
impetusne custodes publici contra reclamantes facerent.
In terra Syriaca tamen verum bellum geritur:
quinquaginta fere reclamantes perierunt his diebus in proeliis
contra regiminis milites; in capite Damasceno iterum populus
reclamat, cum exeunte mense Ianuario rebelles expulsi esse visi
sint. Hesterno die, Zhai Jun, Administer Sinensis Exterorum
Negotiorum Praesidentem Syriacum Bashar El Assad visit, exoptans
plebis scitum proximi diei Solis de nova forma civitatis
pluralismum allaturum esse. Sinenses, qui videlicet rectoris
Assad regimini faveant, hortari rem publicam Syriacam et rebelles
ut vim desinant ac suffragia quiete factum iri sperare. Sed
discrimen oeconomicum ob interclusiones rerum commercialium
auxit; mercatura impeditur pretiaque usque ad astra crescunt.
Aegritudo etiam apud cives medii ordinis effunditur. Qua re magni
interest Syriae ut trames maritimus ad Iraniam teneatur ad opes
pecuniarias et militares adipiscendas.
Scripsit
Lydia Ariminensis - 19/02/2012 18h41
.
.
|
|
BREVES
SCIENTIAE
SOCIALIA
RELIGIO
SOCIALIA
RELIGIO
|
