|
|
|
OECONOMIA
De Fundo Monetali Internationali aliisque rebus oeconomicis
 De Fundo Monetali
Internationali aliisque rebus oeconomicis
Mense Septembre proximo, Fundus Monetalis
Internationalis, cui praeest Christina Lagarde, ut fit quotannis,
congressum habuit; ibique ex 187 nationibus repraesentantes
cum de statu oeconomico internationali tum de Europa Statibusque
Unitis triduum disputarunt; ex omnium tamen opinionibus
gravissimum discrimen ex Graecia pendet, nam haesitabant utrum ea
esset salva an in decoctionem se iniceret. Multae enim Europaeae
nummariae aliquantum pecuniae in mercatu mensario Graeco
locarunt, quam pecuniam, Graecia deficiente, recuperare non
possent; inde in aliis nationibus fieri potest oeconomica
deminutio sive retardatio, quae si inveterasceret, habebitur
cessatio etiam fortasse gravior quam ea anno 1930 habita, nam ubi
fiducia deest ibi status futurus oeconomicus est incertus.
Nationes tamen
quae in Fundo intersunt ad pericula subeunda et sunt paratae et
ad correctiones intra non longum tempus agendas promptae;
sed Europa fere nullo oeconomico incremento fruitur;
idcirco rerum quae labefiunt meditullium in Euroregione
invenitur.
De pessimi status
oeconomici causis oportet hic illic audiamus oeconomistarum
quaedam argumenta in políticos, qui suffragiorum captandorum
causa ab aerario fiscali populo pecuniam tantam et promiserint et
dederint quantam ab oeconomica actuositate exspectandam non
debuerint.
Praeterea incolae
Graeci, qui ex securitate sociali opes accipere iam erant
assuefacti, nunc beneficiorum deminutionem repellunt et palam per
vias tumultuose reclamant; Graecia, ut putatur, usque in
postremum Octobris diem opes ad debita solvenda habet et nisi
opes accipiat, difficillime labem vitabit; quae opes amplae
diutinaeque esse debent ut a decoctione liberetur. Id omnium
interest, nam certum est nullam nationem ita esse permunitam ut,
gravissimis rebus, eveniat indemnis.
Oeconomiae
mundanae iam adest retardatio, qua praesertim nationes magis
evolutae afficiuntur necnon Status Uniti, ubi, quod antea
nemo possibile credebat, similes ac in Graecia tumultus in
nummarios aguntur. Praeses Obama, qui tumultuosis se concordem
praebet, putatur legem de oeconomia tuenda a parlamentariis
propositam tandem probaturus, nam tuendam putant oeconomiam ne ab
aliis nationibus laedatur, vel a Sericis, qui parvo manupretio in
officinis sedulo laborant et gubernatores dollarium consulto
magni exsistimant, adeo ut ex Sinis plurima mercimonia
consumptores Septentrioamericani cupiant vili pretio
importare; id et domesticae industriae nocet et operarios
locos adimit. In Statibus autem Unitis ex centenis, qui laborare
possunt, novem locum ad pecuniam merendam frustra quaerunt.
Ex his omnibus
efficitur ut Europaeis et Septentrioamericanis pecunia in
mutuando partim deficiat et aliquae nummariae Europaeae pecuniam
mutuam, nisi iniquissimo faenore, iam dare non audeant:
instat enim cessationis periculum, nam orbis terrarum non est
disiunctus; immo, mundializatio quae plerumque prodest etiam
aliquando obesse potest.
Attamen nationes
magis evolutae sunt fundamentum, si recte agant, ad
hodiernas vicissitudines feliciter superandas. Ut saepe videtur,
damna quoque ex dolo et illicitis negotiis eveniunt; scimus
Bernardum Madoff multos fraudavisse vel Graeciae rationes
fiscales dolose esse fictas. Itaque negotiatores atque actores
oeconomici ethica egent, adeo ut, ni eam colant,
mercatum, ex quo ipsi lucrant, pessime sint laesuri.
Scripsit Paulus Kangiser -
- 15/10/2011 21h26
.
.
|
|
BREVES
SCIENTIAE
SOCIALIA
RELIGIO
SOCIALIA
RELIGIO
|
