|
|
|
OPINIONES
Hic scriptores diversi sententiam suam aperiunt.
Aliquid de "
 Aliquid de
"globalizatione" dicere liceat
Quid est “globalizatio”? Omnibus
constat esse per totum orbem transitum hominum, nuntiorum,
imaginum, omnium generum bonorum, idque multo velocius quam antea
(“clic” omnia movet!) evenit, ita ut orbis denique
minor factus esse videatur. Quamobrem mirum non est si in
islamicis nationibus iuvenes praesertim maiorum mores non amplius
tolerant, libertates contra propugnant, quibus iam diu alibi
populi fruuntur (exempli causa scholam adire, autoraedam ducere,
suffragium ferre et cetera); non tolerant religionis praecepta ut
leges valere, patrem pro filia (etsi invita) sponsum eligere.
Sunt filiolae quae patrum iussus misere accipiant; sunt contra
quae his obstent.
 Quis ignorat cuiusdam Hinae
pakistanae (haec in Italia vivebat) triste fatum, quae necata est
quod italicum modum vivendi accepisset et nubere recusavisset
cuidam in Pakistano viventi (aetate provecto) a patre electo?
Pudebat hunc quod filiola maiorum moribus et patris potestati
obstaret; tolerare non poterat se a ceteris pakistanis minoris
haberi quam antea; timebat praesertim ne a Pakistanorum
communitate amoveretur. Plus quam patris amor potuit superstitio
et religio!
Quid praeterea de tristi fato, quod in
Bangladesh nuper duos adolescentes ad mortem perduxit? Vi coacta
filiola sedecim annos nata viro multo maiori nato nupserat. Die
constituta eadem et pristinus amans turrem quandam ascenderunt,
unde paulo post manibus fascia colligatis se deiecerunt.
Horrendae res et in Europaeis et in islamicis nationibus
eveniunt: eadem libertatis penuria eas efficit, sic ut mors vitae
infelici anteponenda videatur
Sperandum est res in toto orbe mutari posse,
etsi gradatim sed velocius quam antea … “globalizatione”
adiuvante.
Scripsit Dominicus Caveosanus - 06/03/2012 11h04
.
.
|
|
BREVES
SCIENTIAE
SOCIALIA
RELIGIO
SOCIALIA
RELIGIO
|
