PERCONTATIO
Untitled
 “Temporibus nostris eos
interficere scilicet nobis non iam licet”
Diurnarii actorum septimanalium
„Profil“ cum Bojano Rasate , duce societatis nationalis
Bulgarici, collocuti sunt.
Profil: domine Rasate,
de difficultatibus quibusdam locutus es, quas Romanes afferrent.
Num nationalismus solutiones praebere potest?
Rasate: sunt quidem illi
alieni, alieno loco orti, qui ad mores nostros se accommodare
debent. Temporibus mutatis non id scilicet cogitare nobis licet,
ut eos interficiamus. Sed hoc tempore Romanes Bulgaris praeferri
molestum est.
Profil: num omnes
Romanes scelesti sunt?
Rasate: XC fere centesimae
eorum. aut LXXX. aut LXXXV.
Profil: magistratus
ergo rigidiores esse oportebit?
Rasate: si ita esset, XX
centesimae eorum, qui in custodia publica sunt, Bulgari essent,
reliquae autem LXXX centesimae essent Romanes.
Profil: ergo
nationalistae hodierni poscunt, ut res publica in ea re magis
contendat?
Rasate: primum civitas
dividenda est in indigenas et in alienos. Deinde Bulgaros iura
quaedam praecipua habere oportebit.
Profil: quis est vir
vere Bulgaricus? Qua ratione definitur?
Rasate: eadem ratione, qua
Germanus definitur.
Profil: num origo
Ariana ei demonstranda erit?
Rasate: quidni? Homines
natura inter se differunt.
Profil: quis tibi vir
vere Bulgaricus esse videtur?
Rasate: inepte interrogas.
Quonam modo e.g. fenestram albam definiam? Alba est.
Profil: interrogatum
meum minime ineptum esse puto. Nam si civitatem dividas in
sinceros Bulgaros et in alienos, quomodo sinceri illi Bulgari
definientur?
Rasate: ex genere eorum.
Profil: et quomodo
genus Bulgaricum definietur?
Rasate: Bulgari sunt colore
albo, vultu Europaeo. Conscii sunt historiae suae communis.
Bulgarico sermone suo patrio utuntur. Denique his temporibus XC
centesimae eorum in rebus agendis industrii
Profil: num ex munere
officii genus hominis cognoscitur?
Rasate: ita est.
Profil: ergo homo ex
gente Romanium, si colore albo est, si munere operarii fungitur,
si maiores eius nonnulla saecula in Bulgaria vivebant, Bulgarus
esse potest?
Rasate: non refert, quam
diu maiores eius iam hic vivant, dummodo sanguine et mente
Bulgarus sit.
Scripsit Volfgangus Austriacus - 26/02/2010 19h52
.
.
|
