|
|
|
RELIGIO
De aerumnis et tentationibus effugiendis
 De aerumnis et tentationibus effugiendis
(excerptum ex scriptis Martini Lutheri)
Verbum quoddam, forsitan leviter enuntiatum, nos potest in
tempore aerumnae ad conscientiam revocare. Cum ego iterum atque
iterum stulta peccata confiterer, presbyterus mihi dixit:
"Insanis! nam non Deus tibi, sed tu Deo irasceris."
Verbum magnificum! Ita mihi afflicto olim solacium tulit
Pomeranus: "Sine dubio cogitat Deus: quid mihi aliud cum hoc
viro agendum est? Multis miris donis istum replevi, qui dubitat
de gratia mea?" Quod verbum mihi magno solacio fuit et cor
meum confirmavit sicut vox angelica. Certus sum ipsum conscium
non fuisse, quid significaret illud et quam gratum esset.
Postea dixit: "Ei, qui aerumnae spiritu affligitur,
solitudo praecipue effugienda est; quam ob rem Deus ecclesiae
societatem instituit et fraternitatem imperavit, sicut in
Scripturis: "Vae soli! cui cum cecidit nemo auxilium
tulit." Ne cordis aerumna quidem Deo grata est, etsi
aerumnas in mundo esse concedit; non vult tamen, me coram se
suique causa perturbari, sicut dicit: "Non gaudeo ob mortem
peccatoris" et "Iubilate semper in Domino". Non
vult servum, qui sibimet non consulat. Hoc pro certo habeo, nam
singulo die deciens in peccatum vertor, Satanae tamen obsisto.
Expertus hoc novi et vos edocere possum, quomodo tentationibus
obsistere possitis: quotienscumque aut afflictione aut dubiis aut
angustiis tentamini, comedite, bibite, laetamini; si cogitatio
feminae vos torquet, ita agite! Episcopus fuit, cuius soror in
coenobio vivens continenter foedis somniis de fratre suo
perturbabatur. Quae fratrem suum visit eique narravit se saepe
nefariis somniis vexari. Frater illi sumptuosam cenam coquendam
curavit sororemque hortata est, ut laute comederet et biberet.
Postridie ille sororem interrogavit, foedane somnia vidisset:
"Minime! - respondit mulier - Placide requievi sine ulla
nocturna visione." Cui ille: "Ita perge! - ait -
Stomacho tuo consule, ut Satanae resistas, neque amplius nefaria
somnia redibunt."
Illud tamen scitote, eandem rationem non omnes iuvare. Me
fortis potus iuvat, iuvenem hac tantum pactione ad hoc exhortor,
si eodem tempore famem expleat. Alii abstinentia, alii potatio
prodest. Plane dicit Augustinus in Regula: " Non omnibus
eadem res apta est, nam non eadem ratione sani estis." Sicut
de corpore, hoc de animarum morbis confirmari potest.
Ex lingua Germanica convertens
Scripsit Herimannus Novocomensis - 27/09/2012
.
.
|
|
BREVES
SCIENTIAE
SOCIALIA
RELIGIO
SOCIALIA
RELIGIO
|
