|
|
|
SCIENTIAE
Ventimolinae electriferae
 Ventimolinae
electriferae
Antiquitus de ventis, quibus deus erat Aeolus,
energeiam ad naves veliferas impellendas nautae sumebant,
totumque mare mercandi causa percurrebant modo pacifico; naves
enim usui militari destinatae remigiis praesertim movebantur; ab
aetate autem media usque ad saeculum XIX, frumentum in farinam
vento ubique reddebant; nunc vero ex ventimolinis energeia
electrica gignitur; ventimolinae ergo electriferae inventae sunt.
Electricitas generatur a turbina quae est quasi
turben cuius rotatio campum magneticum inducit, turbina autem est
rota cui alae in circuitu adiunguntur ita ut aqua aut vento super
alas sua vice imposito, rota moveatur; haec alae linguis
hodiernis plerumque "alabes" nuncupantur.
Nostris temporibus electricitas praesertim ex
electrificinis oritur; hae sunt aut hydricae, quae aqua in alto
stagno cumulata in magnas turbinas deiecta electricitatem gignunt
et idcirco hydroelectricae vocantur; aut thermoelectricae quae
vel carboni petroleive potentia turbinas rotare compellunt.
Officinae hydroelectricae magno pretio extruuntur sed postea
electricitatem vili generant; sed tamen stagnum, quo aquae
cumulantur, latissimum agrum fluctibus inundat, quod non minoris
pretii aestimatur; thermoelectricae vero officinae, cum carbonum
petroleumve combusserint, magna pollutione aërem contaminant.
In systematibus ad electricitatem generandam,
quae energeiam sine pollutione gignunt, numerandae sunt
electrimolinae et cellulae solares; hae vero adhuc maximo pretio
comparantur; ventimolinae electriferae viliores quam illae
cellulae sed cariores quam electrificinae hydricae aut thermicae
haberi possunt. Inde patet ab aeolica vi in spem limpidae
energeiae nos venire posse, quam ob rem aliquae nationes
subsidium publicum dant pro electrimolinis, quod, quanvis
mercatum liberum aliquatenus afficiat, tamen plurimum decet
pro hominum salute atque futura progenie.
Plura de hac re inveniuntur Hispanice in hac
pagina interretiali: www.vestas.com/es
Scripsit Paulus Kangiser - 20/10/2010 20h48
.
.
|
|
BREVES
Turcia. Relatores Turci XXII annorum poena damnati ob involucrum diurnarii, quod "ad seditionem excitavit". - 22/05/2017 23h42
Inter 160 et 200 bellatores Curdici mortui sunt die Iovis ob ictus aeroplanorum Turcicorum in boreali parte Syriae – nuntiaverunt duces exercitus Turcici. Bellatores autem Curdici maximi socii sunt US-Americanorum contra Califatum Islamicum pugnantium. - 20/10/2016 13h34
Shimon Peres, princeps Israelianus, qui anno MCMXCIV Praemio Nobeliano pro pace exornatus fuit, agens nonagesimum quartum annum aetatis obiit. - 03/10/2016 18h31
VIDE ETIAM
|
