Post Coranum combustum...

Non desinunt perturbationies in Afganistania, postquam aliquot exemplaria Corani, libri sacri Muslimorum, ab USAe militibus combusta sunt: summatim viginti homines post nuntium hunc pervulgatum vitam vi amiserunt, quamquam ipse praesidens Civitatum Americae Unitarum litteris Afganorum praesidenti publice missis veniam petisset.

Caburae, in maxima Afganorum urbe, vir solus primum duobus militibus ex copiis securitatis mundanis (ISAF) iniurias intulit, deinde eos octo scloperationibus interfecit: scelus in ipsa sede ministerii rerum internarum (quae in imagine adposita conspicitur) perpetratum est, forsitan a milite Afgano. Nuntius Talibanorum laudat "heroicum pugnatorem Abdul Rahman" ut caedis auctorem.

Kunduz, in oppido septemtrionali, cruento tumultu quattuor victimae numerantur, in unum ex ONUs palatiis ignis admotum est; tres interfecti sunt in provincia meridionali Logar, domus provinciae Laghman gubernatoris obsessa est, passim populi perturbationes referuntur.

Scripsit Herimannus Novocomensis