De discrimine oeconomico Europaeo

“Angustiae oeconomicae non ad finem perductae sunt” ait Egnatius Visco, moderator Argentariae Primariae Italicae; multa emendanda esse ad fovendam Italiae facultatibus fidem atque ad augendum proventum oeconomicum. Sed perseverandum esse obsistere iis qui vectigalia ac tributa non conferant; aes alienum Italiae quod est circiter centum centesimam vigesimam partem (120 %), minuturum esse a proximo anno. Eius sententia, etiam in ceteris nationibus Europae multa reformanda sunt ut auctus celerior fiat et examine aequo oeconomia publica et privata ponantur.

Res ad hoc tempus maxime aptae sunt praesertim cum Hispania feratur centum miliarda euronum auxilium petitura esse: quae fenori dabuntur argentariis ad servandum statum nummarium rei publicae Hipaniae pro reformatione pecuniaria. Iam difficillimam condicionem Graeciae novimus, ad quam servandam mille miliarda opus sint; nonne Italia in eandem difficultatem pecuniariam incurrit? Sunt qui putent trecenta miliarda danda esse Italiae auxilio; sed, ut videtur, conservatione rei publicae Hispanicae unda longa discriminis vitanda est.

Scripsit Lydia Ariminensis